देम्बा डाँडामा खेलाइयो गल्फ, उपयुक्त गल्फ कोर्ष रहेको गल्फरको प्रतिक्रिया

वैशाख ०२, ओखलढुंगा ।    ओखलढुङ्गाको खिजीदेम्बा गाउँपालिकाले गल्फ प्रतियोगिता सञ्चालन गरेको छ । जिल्लामै पहिलो र देशकै दशाैँगल्फ कोर्षकाेरूपमा खिजीदेम्बा गल्फ कोर्सको स्थापना गरेर देशकै साताैँ अग्लाे डाँडा मध्ये एक देम्बामा गल्फ प्रतियोगिताको आयोजना गरिएको हो  ।  पर्यटकीय हबको रुपमा गाउँपालिकालाई स्थापित गर्ने उद्देश्य सहित गाउँपालिकाले पहिलो पटक गल्फ महोत्सवकै आयोजना गरेर विश्वका प्रसिद्ध खेलाडीहरू भित्र्याउँदै गल्फ प्रतियोगिता आयोजना गरिएको जनाइएको छ ।

 गाउँपालिका अध्यक्ष गम्बु शेर्पाको सभाध्यक्षता, राज्य व्यवस्था तथा शुसासन समितिका सभापति रामहरी खतिवडाको प्रमुख आतिथ्यतामा नयाँ वर्षको दिन बैशाख १ गते देम्बा डाँडामा गल्फ प्रतियोगिता एवं गल्फ महोत्सवको  आयोजना गरिएको थियो ।  महोत्सवकै रुपमा कार्यक्रम आयोजना गरि गाउँपालिकामा गल्फ र पर्यटनलाई जोड्दै खेल बाट पर्यटनको प्रवर्द्धन तथा विकास गर्न गाउँपालिका विगत ३ वर्ष देखी लागी परेको र यस वर्ष सफल भएको अध्यक्ष गम्बु शेर्पाले बताउनुभयो ।

समुन्द्री सतहबाट ३ हजार ३ सय ५० मिटरको उचाईमा रहेको डाँडामा गल्फ कोर्स स्थापना गरि विश्वको सवोच्च शिखर सगरमाथा सहित विभिन्न हिमशृङ्खलाकाे अवलोकन गर्दै गल्फ खेल्न सकिने गरि यहाँ गल्फ कोर्सको निर्माण गरिएको अध्यक्ष शेर्पाले बताउनुभयो । उहाँले हरेक वर्ष कम्तीमा २ पटक र वर्षमा १ पटक उक्त कोर्समा अनिवार्य गल्फ प्रतियोगिताको आयोजना गर्नेगरी गाउँपालिकाले तयारी गरिरहेको पनि उल्लेख गर्नुभयो ।

उहाँले उक्त देम्बा डाँडालाई गल्फ खेलका लागी प्रसिद्ध बनाउँदै विश्वभरमा कुनै पनि देशमा यसरी हिमालको काखमा गल्फ खेल्न नसकिने भएकाले यसलाई व्यवसयीक गल्फ स्पटको रुपमा विकास गर्न सकिने सम्भावना रहेको पनि उल्लेख गर्नुभयो ।

 गल्फ खेल्न कोरिया, जापान, क्यानडा, अमेरिका लगायत देशबाट अन्तराष्ट्रिय गल्लीहरू आइपुगेका थिए भने राष्ट्रिय स्तरका खेलाडीहरु समेतले सहभागिता जनाएका थिए  । खेलाडीहरूले कुनैपनि ठाउँमा यस्तो गल्फ कोर्स नभएकाले खिजीदेम्बाको उच्च स्थानमा रहेको यो गल्फ कोर्स निकै उपयुक्त र खेलाडीहरूकाे लागी उत्साहजनक भएकाे टिप्पणी समेत गरेका थिए ।

 गल्फ कोर्स उद्‌घाटन कार्यक्रममा पूर्व माननीय यज्ञराज सुनुवार, प्रदेश सांसदहरू प्रदिप सुनुवार तथा बाबुराम गौतम गाउँपालिका उपाध्यक्ष शुसिला तामाङ, प्रमुख प्रशासकीय अधिकृत गौरव केसी, लगायत वडा अध्यक्षहरुको उपस्थिति रहेको थियो ।