फागुन ३०, सोलुखुम्बु । सोलुखुम्बुको सोलुदुधकुण्ड नगरपालिकामा सञ्चालन भइरहेको बेनी हाइड्रोपावर लिमिटेडको स्थानीय सेयर निष्कासनलाई लिएर विभिन्न वडाका जनप्रतिनिधि र स्थानीयबीच विवाद चर्किएको छ। कम्पनीले आयोजना प्रभावित क्षेत्रको वर्गीकरण गर्दा केही वडालाई मात्र “अति प्रभावित क्षेत्र” मा राखेको भन्दै अन्य वडाका जनप्रतिनिधिहरूले विरोध जनाएका छन्।
कम्पनीले आयोजना सञ्चालन भइरहेका वडा नम्बर २, ३ र ४ लाई “अति प्रभावित क्षेत्र” तथा वडा नम्बर ५, ६, ७ र ११ लाई “प्रभावित क्षेत्र” को सूचीमा राखेर स्थानीय सेयर वितरणको व्यवस्था गरेको छ। यस निर्णयप्रति वडा नम्बर ५, ६, ७ र ११ का जनप्रतिनिधिहरूले फरक मत राख्दै आन्दोलनका कार्यक्रम अगाडि बढाएपछि नगरपालिकाले गम्भीर ध्यानाकर्षण जनाएको छ। नगरपालिकाका मेयर नाम्गेल जाङ्बु शेर्पा ले आपसी वैमनस्यता बढाउने गतिविधि नगरी समन्वय, संवाद र सहकार्यको माध्यमबाट समस्या समाधानतर्फ अघि बढ्न सबै पक्षलाई आग्रह गर्नुभएको छ।
उहाँले आगामी दिनमा नगरक्षेत्र तथा सोलुखुम्बु जिल्लाभित्र सञ्चालनमा रहेका अन्य जलविद्युत आयोजनाहरूले स्थानीय सेयर निष्कासन प्रक्रिया अघि बढाउँदा प्रारम्भिक चरणदेखि नै नगरपालिकासँग समन्वय गर्नुपर्ने पनि बताउनुभयो। शुक्रबार वडा नम्बर ५, ६, ७ र ११ का जनप्रतिनिधि तथा स्थानीयले बेनी हाइड्रोपावर कार्यालयमा तालाबन्दी गरेका थिए। त्यसपछि वडा नम्बर २, ३ र ४ का जनप्रतिनिधि तथा स्थानीयको उपस्थितिमा उक्त ताला तोडिएको थियो। त्यसैगरी शनिबार पनि विवाद थप चर्किएको छ। वडा नम्बर ५, ६, ७ र ११ का जनप्रतिनिधि र स्थानीयहरूले बेनी हाइड्रोपावरको लाइन स्विच अफ गरेका छन् भने वडा नम्बर २, ३ र ४ का जनप्रतिनिधि तथा स्थानीयहरूले मिड सोलुले प्रयोग गरेको पानी पुनः खोलामा फर्काएका छन्।
कम्पनीले आगामी चैत १ गतेदेखि प्रारम्भिक सार्वजनिक निष्कासन (आईपीओ) जारी गर्ने तयारी गरिरहेको छ। कम्पनीले गत माघ २९ गते नेपाल धितोपत्र बोर्ड बाट जारी पूँजी १ अर्ब ४ करोड रुपैयाँको २० प्रतिशत बराबर २० करोड ८० लाख रुपैयाँको आईपीओ निष्कासनका लागि अनुमति प्राप्त गरेको हो। यसअनुसार १०० रुपैयाँ अंकित दरमा २० लाख ८० हजार कित्ता साधारण सेयर जारी गरिनेछ। कुल निष्कासन हुने सेयरमध्ये १० प्रतिशत अर्थात १० लाख ४० हजार कित्ता आयोजना प्रभावित क्षेत्रका बासिन्दाका लागि छुट्याइएको छ।
यसमध्ये वडा नम्बर २, ३ र ४ का स्थायी बासिन्दाका लागि ५ लाख २० हजार कित्ता (५० प्रतिशत), वडा नम्बर ५, ६, ७ र ११ का बासिन्दाका लागि ३ लाख १२ हजार कित्ता (३० प्रतिशत) र अन्य क्षेत्रका बासिन्दाका लागि २ लाख ८ हजार कित्ता (२० प्रतिशत) सेयर छुट्याइएको कम्पनीले जनाएको छ। तर वडा नम्बर ५, ६, ७ र ११ का जनप्रतिनिधिहरूले आफूहरू पनि आयोजनाबाट प्रत्यक्ष प्रभावित भएको दाबी गर्दै “अति प्रभावित क्षेत्र” को समान हैसियतमा राखेर सेयर वितरण गर्नुपर्ने माग गरेका छन्।
उनीहरूले निर्णय सच्याइएन भने चरणबद्ध आन्दोलन सुरु गर्ने चेतावनी दिएका छन्। कम्पनीले भने नियामक निकायको स्वीकृतिपछि तय गरिएको मापदण्डका आधारमा सेयर वितरण संरचना बनाइएको जनाएको छ। स्थानीय तहका जनप्रतिनिधिहरूबीचको विवाद र बढ्दो असन्तुष्टिका कारण कम्पनीको आईपीओ निष्कासन प्रक्रिया प्रभावित हुन सक्ने देखिएको छ । अब कम्पनीले निर्णय पुनर्विचार गर्छ कि आन्दोलन अझ चर्किन्छ भन्ने विषयमा सोलुखुम्बुमा चासो बढेको छ।
Discussion about this post