ओखलढुंगाको भित्रि सडक खण्ड पहिरोले अवरुद्ध

भदौ २०, सोलुखुम्बु । खानिभञ्ज्याङ ओखलढुंगा भित्रि कच्ची सडक खण्ड बुधवारदेखि पहिरोले अवरुद्ध भएको छ । अबिरल वर्षाका कारण ओखलढुंगा चिसंखुगढी गाँउपालिका २ स्थित खानिभञ्ज्याङ ओखलढुंगा भित्रि कच्ची सडक खण्ड अबरुद्ध भएको हो ।

बुधवार रातीदेखि परेको अविरल वर्षाका कारण सडक माथिबाट खसेको पहिरोले सडक अबरुद्ध भएको जिल्ला प्रहरी कार्यलय ओखलढुंगाका प्रहरी निरीक्षक तथा सूचना अधिकारी बिजय कार्कीले जानकारी दिनुभयो ।

बिहिवार विहान प्रहरी चौकी खानिभञ्ज्याङलाई स्थानियहरुले खबर गरेका थिए । प्रहरी चौकी खानिभञ्ज्याङबाट खटिएको प्रहरी टोलीका अनुसार उक्त स्थानमा सडकमाथिबाट अहिलेपनि ढुड्गा माटो सहितको पहिरो झरिरहेको छ ।

प्रहरीको टोली र जेसिबी पहिरो भएको स्थानसम्म पुगेपनि पहिरो ठुलो र माथिबाट ढुंगा माटो झर्ने क्रम नरोकिएकाले तत्काल सडक खुलाउन सक्ने अवस्था नरहेको प्रहरीले जनाएको छ ।