माओवादी सोताङको सम्मेलन पौष २६ मा हुँने 

मंसिर २५, सोलुखुम्बु । नेकपा माओवादी सोताङले स्थानीय सरकारको  ज्यादती बिरूद्ध प्रमाणसहित खबरदारी गर्ने भएको छ । सोमबार सम्पन्न सोताङ गाउँपालिका कमिटीको पूर्ण बैठकले आगामी पौष २६ गते पालिका सम्मेलन गर्ने निर्णय सहित अन्य विभिन्न निर्णय गर्दै स्थानीय सरकारको खबरदारी गर्ने जनाएको हो ।

माओवादी केन्द्र सोलुखुम्बुका प्रचारप्रसार समिती संयोजक भोजराज कार्कीका अनुसार आगामी पौष २६ गते सोताङ गाउँपालिका सम्मेलन हुने निश्चय भएको हो ।  सोताङ गाउँ पार्टी समितिका अध्यक्ष गोविन्द नाछिरिङको अध्यक्षता तथा  तथा माओवादी केन्द्रका केन्द्रीय सदस्य एवम् जिल्ला इन्चार्ज हेम कुमार राई (शुरवीर) को प्रमुख आतिथ्यतामा सम्पन्न बैठकले यस्तो निर्णय गरेको कार्कीको भनाई छ ।  

उक्त बैठकले गोविन्द नाछिरिङको संयोजकत्वमा ५ सदस्य खबरदारी समिति गठन गर्दै  स्थानीय सरकारले गरेको बेथीति र ज्यादतीको विरुद्ध प्रमाण सहित खबरदारी गर्ने संयोजक गोविन्द नाछिरिङले बताउनुभयो । सोही बैठकले सबै वडामा जन भेटघाट तथा प्रशिक्षण लगायत कार्य यही २९ गते देखि गर्ने बताइएको छ ।  

प्रशिक्षण सहितको  बैठकलाई सम्बोधन गर्नका लागि पार्टीका केन्द्रीय सदस्य तथा जिल्ला इन्चार्ज हेमकुमार राई (शुरवीर), केन्द्रीय सदस्य गोम्बु शेर्पा (कर्ज्याङ), प्रदेश समितिका सहसचिव सागर किराँती, प्रदेश समितिका सचिवालय सदस्य तथा सोलुखुम्बुका सहइन्चार्ज असिम राई, प्रदेश सदस्य तथा जिल्ला संयोजक नाम्गेल शेर्पा लगायतका नेताहरूको उपस्थिति रहेको थियो ।