पुर्व मन्त्री राजभण्डारीले गरे सारे पहिरोको निरिक्षण, तिनै तहका सरकारसँग क्षति न्यूनिकरणका लागी पहल गर्ने प्रतिबद्धता 

मंसिर २६, सोलुखुम्बु । सोलुदुधकुण्ड नगरपालिका वडा नम्बर ११ तिङलामा गएको सुख्खा पहिरोको पूर्व सामाजिक विकास मन्त्री बुद्धिराज भण्डारीले अनुगमन गर्नुभएको छ ।  केही समय अघि सारे गाउँ मुनी गएको सुख्खा पहिरोले गाउँनै जोखिममा पारेपछि कोशी प्रदेशसभा सदस्य तथा पूर्व सामाजिक विकासमन्त्री राजभण्डारीले स्थलगत अवलोकन गर्नुभएको हो ।  उहाँले स्थलगत निरीक्षणका क्रममा पहिरोको अवस्था जोखिमपूर्ण भएकाले भूगर्भविदको सल्लाह बमोजिम अगाडि बढ्ने बताउनुभयो ।

उहाँले सङ्घीय सरकार र प्रदेश सरकारमा पहिरो र यसको जोखिमको विषयमा जानकारी गराई रोकथाम र नियन्त्रणका लागी आवश्यक पहलकदमी गर्ने प्रतिबद्धता व्यक्त गर्नुभएको छ ।  उहाँले वर्षायाममा पहिरोको उच्च जोखिम हुने भएपनि हाल डराउनुपर्ने अवस्था नरहेको जिकिर गर्नुभयो  । उहाँले पहिरोबाट हुनसक्ने जनधनको क्षति रोक्न बस्ती स्थानान्तरणका लागी रक्षा मन्त्रालय सहित प्रदेश सरकारका मन्त्रालयमा कुरा लैजाने प्रतिबद्धता व्यक्त गर्नुभयो ।

 यस्तै स्थानीय रामचन्द्र कार्कीले तिङ्ला यसैपनि पहिरोको उच्च जोखिममा पर्ने र हाललाई आफ्नो बासस्थानमै जोखिममा परेको भन्दै सरकारको ध्यानाकर्षण गराउनुभयो । उहाँले सुख्खा पहिरो स्थानीयले कल्पना गरेको भन्दा बाहिरको विषय भएकोले बासिन्दाहरूलाई त्रासदी फैलिएको समेत बताउनुभयो ।

 सोलुदुधकुण्ड नगरपालिका सहित विभिन्न निकायमा पहिरोको बारेमा जानकारी गराइ सकिएकोले केही सुनुवाइ हुने आशामा नागरिक रहेको पनि उहाँको भनाई थियो ।  सुख्खा पहिरोको विषयमा यस अघि पनि जिल्ला प्रशासन कार्यालयका प्रमुख जिल्ला अधिकारी अनोज कुमार घिमिरेले समेत निरीक्षण गरि यसको लागी आफूले सक्दो पहल गर्ने पनि बताउनुभयो ।