नेचासल्यानमा सुरु भयो चौथो राष्ट्रपती रनिङ शिल्ड प्रतियोगिता 

माघ २३, सोलुखुम्बु । सोलुखुम्बुको नेचासल्यान गाउँपालिकामा चौथो राष्ट्रपती रनिङ शिल्ड प्रतियोगिता सुरु भएको छ ।  गाउँपालिकाको आयोजनामा हुने अन्तरमावि स्तरीय राष्ट्रपति रनिङ शिल्ड प्रतियोगिताको गाउँपालिका अध्यक्ष धनजन राईले उद्‌घाटन गर्नुभएको हो ।  गाउँपालिका स्तरीय राष्ट्रपती रनिङ शिल्ड प्रतियोगितामा गाउँपालिकाका ६ वटा माविका सहभागीता रहेको छ ।  त्रिदिवसीय प्रतियोगिताको पहिलो दिन आज उद्‌घाटन समारोह सहित विभिन्न विधाका खेलकुद प्रतियोगिताहरू भएका छन् ।  

मङ्गलबार तेक्वान्दोको तर्फका खेलहरु सम्पन्न भएका छन् भने, सर्टफुट तर्फका खेलहरू छात्रछात्रा दुवैका फाइनल खेल भइसकेका छन् ।  यस्तै छात्रा तर्फको भलिबलका ३ वटा खेलहरू सम्पन्न भएका छन् ।  रनिङ शिल्डको उद्‌घाटन गर्दै गाउँपालिका अध्यक्ष धनजन राईले स्वास्थ्यका लागी खेलकुद राष्ट्रका लागी खेलकुद भन्ने नारा सान्दर्भिक भएको भन्दै विद्यार्थीहरूले गाउँपालिकालाई मात्रै नभएर सिङ्गै राष्ट्रलाई चिनाउने हिसाबले खेल्न आग्रह गर्नुभयो ।  उहाँले अन्तरविद्यालय स्तरीय प्रतियोगिता हुँदा विद्यालयको लागी खेल्ने भएपनि अन्त्यमा त्यो देशको लागी ने सावीत हुने उल्लेख गर्नुभयो ।  उहाँले खेलकुद क्षेत्रलाई अगाडि बढाउन गाउँपालिका साथमै रहेको भन्दै विश्वस्त हुन आग्रह गर्नुभयो   ।

यस्तै रनिङ शिल्डका सभापति, गाउँपालिकाका सामाजिक विकास संयोजक एवं नेचासल्यान गाउँपालिका वडा नम्बर ४ का अध्यक्ष इन्द्र बहादुर राई शान्तले राष्ट्रपति रनिङ शिल्ड प्रतियोगिताको गाउँगाउँमा खेलाडी उत्पादन गरिरहेको भन्दै उहाँले अनुशासित भएर खेल खेल्न आग्रह गर्नुभयो ।

कार्यक्रममा बोल्दै गाउँपालिकाका शिक्षा शाखा प्रमुख माधवमणि ढुङ्गानाले पनि कार्यक्रम सफल बनाउनुपर्नेमा जोड दिनुभयो ।  उहाँले खेल समयतालिका अनुसारै हुनुपर्नेमा जोड दिनुभयो ।  कार्यक्रममा बोल्दै राष्ट्रपति रनिङ शिल्ड नेचासल्यान गाउँपालिकाका रेफ्री संयोजक मिलन केसीले निष्पक्ष ढङ्गले र मर्यादित ढङ्गले खेल सम्पन्न गराउने प्रतिबद्धता जाहेर गर्नुभएको छ ।  रनिङ शिल्ड उद्‍घाटन कार्यक्रममा गाउँपालिकाका विभिन्न वडाका वडा अध्यक्षहरू, हिमाल दर्शन माविका प्रधानाध्यापक लाल प्रसाद बाँस्तोला सहित सबै विद्यालयका प्रधानाध्यापक, खेलाडी विद्यार्थी लगायतको उपस्थिति रहेको थियो ।