गार्माका ३ बालक्लव समेटेर बन्यो वडा बाल सञ्जाल, अध्यक्षमा शेर्पा चयन

माघ २५, सोलुखुम्बु । सोलुखुम्बुको सोलुदुधकुण्ड नगरपालिका वडा नं. ७ वडालाई बालमैत्री घोषणा गर्न लागेको गार्माले वडा बाल सञ्जाल गठन गरेको छ । औपचारिक रुपमा बैशाख १ गते जिल्लाकै पहिलो बालमैत्री वडा घोषणाको तयारी स्वरुप वडाभित्रका विभिन्न विद्यालयमा गठित बालक्लव समेटेर सोलुखुम्बुको सोलुदुधकुण्ड नगरपालिका वडा नं. ७ गार्मामा १५ सदस्यीय वडा बाल सञ्जाल गठन गरिएको हो ।

वडा अध्यक्ष सोनाम ग्याल्जेन शेर्पाको सभापतित्वमा सम्पन्न एक कार्यक्रमका बीच वडा स्तरीय बाल सञ्जाल गठन गरिएको जनाइएको छ । वडामा सञ्चालित गार्मा मा.वि., सगरमाथा मा.वि. र सेकारसिंह आ.वि. सम्मिलित बाल क्लवलाई एकिकृत गर्दै वडा बाल सञ्जाल गठन गरिएको हो ।

सोलुदुधकुण्ड नगरपालिका कार्यपालिका सदस्य मिना बस्नेत र महिला तथा बालबालिका शाखा प्रमुख रिता ढुंगानाको समेत उपस्थितिमा भएको भेलाबाट बाल सञ्जालको अध्यक्षमा गार्मा मा.वि. का पसी शेर्पा चयन हुनुभएको छ । यस्तै सञ्जालको उपाध्यक्षमा सगरमाथा मा.वि को ङिमा नुरु शेर्पा, कोषाध्यक्षमा सेकारसिंह आ.वि.का पुष्पा कार्की, सचिवमा दोर्जी तामाङ र सहसचिवमा जनक भुजेल चयन हुनुभएको छ । त्यसैगरी सदस्यमा डेविड सहसंकर, पवित्रा कुलुङ, रबिना श्रेष्ठ, दा जाङमु शेर्पा, एलिसा कुलुङ, गेल्मु शेर्पा, छत्र खत्री, सुस्मिता खत्री, सन्दिप कार्की र सुजन खत्री हुनुभएको छ ।

गठित बाल सञ्जालको समितिलाई प्रभावकारी रुपमा सञ्चालन, व्यवस्थान र कार्यान्वयन गर्न प्रत्येक २ महिनामा १ पटक बैठक बस्ने निर्णय भएको छ । शुक्रबार सम्पन्न बैठकको निर्णय अनुसार नयाँ बाल सञ्जालको नाम सुनौलो गार्मा बाल सञ्जाल राख्ने निर्णय समेत सर्वसम्मत पारित गरिएको छ ।