सोलुखुम्बुमा ‘सुरक्षाको घेरा भित्र’ निर्वाचनः चार तहको कमाण्ड, १३ सय बढी सुरक्षाकर्मी परिचालन

फागुन १८, सोलुखुम्बु । हिमाली जिल्ला सोलुखुम्बु आगामी फागुन २१ गते हुने निर्वाचनलाई लक्षित गर्दै बहु–तह सुरक्षा घेराभित्र प्रवेश गरेको छ । दुर्गम भूगोल, विगतका सुरक्षा संवेदनशीलता र मतदान केन्द्रहरूको भौगोलिक फैलावटलाई मध्यनजर गर्दै जिल्ला सुरक्षा संयन्त्रले चार निकायबीच समन्वित कमाण्ड संरचना लागू गरेको हो ।

जिल्ला प्रहरी कार्यालय सोलुखुम्बुका सूचना अधिकारी एवं प्रहरी निरीक्षक विकास राईका अनुसार १ हजार ३ सय ५१ जना सुरक्षाकर्मी प्रत्यक्ष कार्यक्षेत्रमा खटिइसकेका छन् । यसमध्ये ५ सय १० जना नेपाल प्रहरीका नियमित अधिकारी तथा जवान र ८ सय ४१ जना निर्वाचन सुरक्षाका लागि भर्ना गरिएका म्यादी प्रहरी रहेका छन् । जिल्लामा ३ सय सशस्त्र प्रहरी बल परिचालन गरिएको छ, जसमा ४६ जना म्यादी सशस्त्र प्रहरी रहेका छन् ।

कुनै अप्रिय घटना भएमा तत्काल प्रतिक्रिया दिन ‘क्विक रेस्पोन्स’ टोली तयारी अवस्थामा राखिएको छ । मतदान केन्द्रको दोस्रो सुरक्षा घेराको जिम्मा सशस्त्र प्रहरीले लिएको छ भने बाहिरी घेराको कमाण्ड नेपाली सेनाले सम्हालेको छ ।

आवश्यक परे चारवटै सुरक्षा निकायबाट खटिएका जनशक्तिको संयुक्त कमाण्ड लिने अधिकारसमेत सेनासँग रहने व्यवस्था गरिएको छ । चार तहको सुरक्षा संयन्त्र, संवेदनशीलताका आधारमा वर्गीकृत मतदान केन्द्र र रणनीतिक नेतृत्व संरचनासहित सोलुखुम्बु निर्वाचनलाई शान्तिपूर्ण, धाँधलीरहित र भयरहित बनाउने लक्ष्यका साथ अघि बढेको छ ।