सोलुखुम्बुमा शान्तिपूर्ण र उत्साहजनक रूपमा मतदान जारी

फागुन २१, सोलुखुम्बु । हिमाली जिल्ला सोलुखुम्बुमा प्रतिनिधिसभा निर्वाचनको मतदान शान्तिपूर्ण तथा उत्साहजनक रूपमा भइरहेको छ। देशभरका ७७ वटै जिल्लामा आज बिहान ७ बजेदेखि सुरु भएको मतदान बेलुकी ५ बजेसम्म सञ्चालन हुने निर्वाचन आयोगले जनाएको छ। सोलुखुम्बुमा हालसम्म सबै मतदान केन्द्रमा शान्तिपूर्ण रूपमा मतदान भइरहेको सहायक मुख्य निर्वाचन अधिकृत शारदा फुयालले जानकारी दिनुभयो।

उहाँले सबै मतदातालाई ढुक्क भएर मतदानमा सहभागी हुन आग्रह गर्नुभएको छ। जिल्लामा कुल ८५ हजार ५ सय १५ जना मतदाता रहेका छन्। मतदानका लागि १२४ वटा मतदान स्थल र १३९ वटा मतदान केन्द्र तोकिएका छन्। सोलुखुम्बुबाट प्रतिनिधिसभा सदस्यका लागि विभिन्न दलका उम्मेदवारहरू चुनावी मैदानमा रहेका छन्। नेपाली कांग्रेसबाट प्रकाश सिंह कार्की, नेकपा एमालेबाट कल्पना राई, नेपाली कम्युनिस्ट पार्टीबाट असिम राई, राष्ट्रिय स्वतन्त्र पार्टीबाट ऋषिधन राई र श्रम संस्कृति पार्टीबाट बियस राई उम्मेदवार छन्।

त्यसैगरी जनता समाजवादी पार्टी नेपालबाट लाक्पा शेर्पा, आमजनता पार्टीबाट गुणराज एफ भट्टराई, नेपाल मजदुर किसान पार्टीबाट कमलबहादुर मगर, मितेरी पार्टी नेपालबाट श्रीध्वज तामाङ, उज्यालो नेपाल पार्टीबाट पेम्बाछिरी शेर्पा, मङ्गोल नेसनल अर्गनाइजेसन पार्टीबाट मनकुमार गुरुङ तथा राष्ट्रिय प्रजातन्त्र पार्टीबाट राजेन्द्र बस्नेतले उम्मेदवारी दिएका छन्।

मतदाताहरू बिहानैदेखि उत्साहका साथ मतदान केन्द्रमा उपस्थित भएर आफ्नो मताधिकार प्रयोग गरिरहेका छन्। निर्वाचन सुरक्षाका लागि सुरक्षा निकायहरू परिचालन गरिएको छ भने मतदान प्रक्रिया व्यवस्थित र शान्तिपूर्ण रूपमा सञ्चालन भइरहेको छ।