थुलुङ दुधकोशीमा निःशुल्क पाठेघरको मुखको क्यान्सर परीक्षण हुने

फागुन २५, सोलुखुम्बु । सोलुखुम्बुको थुलुङ दुधकोशी गाउँपालिकाको आयोजनामा महिलाहरुका लागि निःशुल्क पाठेघरको मुखको क्यान्सर परीक्षण शिविर सञ्चालन गरिने भएको छ । शिविर मानव अधिकार शान्ति र विकास मञ्चको आर्थिक तथा प्राविधिक सहयोगमा सञ्चालन हुन लागेको गाउँपालिकाले जनाएको छ। शिविरमा महिलाहरुको पाठेघरको मुखको क्यान्सरको परीक्षण एचपिभी डीएनए विधिबाट गरिनेछ।

गाउँपालिकाले ३० वर्ष पूरा भएका महिलाहरुलाई उक्त शिविरमा सहभागी भई सेवा लिन आग्रह गरेको छ । गाउँपालिकाका अनुसार शिविर लोखिम स्वास्थ्य चौकीमा फागुन २१ गते, सामुदायिक स्वास्थ्य इकाई जुबुमा फागुन ३० गते, थुलुङ दुधकोशी अस्पताल मुक्लीमा चैत्र १ र २ गते र सामुदायिक स्वास्थ्य इकाई देउसामा चैत्र ३ गते संचालन गरिने भएको छ ।

पाठेघरको मुखको क्यान्सर महिलाहरुमा देखिने प्रमुख क्यान्सरमध्ये एक भएकाले समयमै परीक्षण र पहिचानले रोगको जोखिम कम गर्न सहयोग पुग्ने विश्वास लिइएको छ । त्यसैले गाउँपालिकाले लक्षित उमेर समूहका महिलाहरुलाई स्वास्थ्य शिविरमा उपस्थित भई परीक्षण गराउन अनुरोध गरेको छ ।