फागुन २६, सोलुखुम्बु । सोलुखुम्बुको सदरमुकाम सल्लेरीमा गरिएको बजार अनुगमनपछि स्थानीय व्यापारीलाई खाद्य सुरक्षा र उपभोक्ता अधिकारप्रति सचेत गराइएको छ। बजारमा म्याद गुज्रिएका तथा अखाद्य वस्तु बिक्री भइरहेको गुनासो बढेपछि प्रशासनले संयुक्त अनुगमन सञ्चालन गरेको हो। सहायक प्रमुख जिल्ला अधिकारी देवेन्द्र सुवेदीको नेतृत्वमा जिल्ला प्रशासन कार्यालयदेखि नयाँ बजार क्षेत्रसम्मका पसलमा अनुगमन गरिएको थियो।
अनुगमनका क्रममा १९ वटा पसल जाँच गर्दा करिब १९ हजार ४ सय ३० रुपैयाँ बराबरका म्याद गुज्रिएका तथा अखाद्य सामग्री बरामद गरी जफत गरिएको प्रशासनले जनाएको छ। बरामद गरिएका सामग्रीमध्ये सबैभन्दा धेरै विभिन्न पेय पदार्थ र जुस रहेको पाइएको छ। साथै, दुई वटा मासु पसलको अनुगमन गर्दा एक पसलमा बिग्रिएको माछा फेला परेपछि तत्काल जफत गरिएको थियो।
अन्य केही पसलमा म्याद सकिएका चकलेट तथा विभिन्न खुद्रा खाद्य सामग्री बिक्रीका लागि राखिएको भेटिएको छ। अनुगमनका क्रममा कतिपय पसलमा मूल्यसूची नराखिएको र व्यवसाय दर्ता नगरी सञ्चालन गरिएको पनि भेटिएपछि प्रशासनले तत्काल सुधार गर्न निर्देशन दिएको छ। यद्यपि व्यापारीहरूले हिमाली जिल्ला भएकाले ढुवानीमा ढिलाइ हुने र कहिलेकाहीँ म्याद नजिक पुगेका सामान बजारमा आइपुग्ने समस्या रहेको बताएका छन्। एक व्यापारीका अनुसार केही दिनअघि मात्रै ल्याइएको चकलेटको म्याद एक महिना अगाडि नै सकिएको पाइएपछि समस्या भएको हो।
सहायक प्रजिअ सुवेदीले व्यापारीलाई सामान खरिद गर्दा उत्पादन मिति र म्याद समाप्त हुने मिति अनिवार्य जाँच गर्न आग्रह गर्दै उपभोक्ताको स्वास्थ्यसँग खेलवाड नगर्न चेतावनी दिएका छन्। आवश्यकता अनुसार आगामी दिनमा पनि बजार अनुगमनलाई थप कडाइका साथ निरन्तरता दिइने उहाँको भनाइ छ। अनुगमन टोलीमा प्रहरी, प्रशासन, घरेलु तथा साना उद्योग कार्यालय, पत्रकार महासंघ, उपभोक्ता हित संरक्षण मञ्च तथा उद्योग वाणिज्य संघका प्रतिनिधिहरूको सहभागिता रहेको थियो।
Discussion about this post