जिल्ला प्रशासन कार्यालय सोलुखुम्बुले आगलागीका सम्भावित घटनाबाट बच्न र जोखिम न्यूनीकरण गर्न सर्वसाधारणलाई सचेत रहन आग्रह गरेको छ। सुक्खा मौसम र हावाहुरी सुरु भएसँगै आगलागी हुने सम्भावना बढेको भन्दै प्रशासनले विभिन्न सावधानी अपनाउन सार्वजनिक सन्देश जारी गरेको हो। प्रशासनले खाना पकाइसकेपछि ग्यास चुल्हो, स्टोभ वा आगो पूर्ण रूपमा निभाउन तथा ग्यास सिलिन्डरको रेगुलेटर राम्ररी बन्द गर्न अनुरोध गरेको छ।
त्यसैगरी चुरोट, बिडी जस्ता धुम्रपानजन्य वस्तु स्वास्थ्यका लागि हानिकारक मात्र नभई आगलागीको प्रमुख कारण बन्ने भएकाले सकेसम्म प्रयोग नगर्न र प्रयोग गरेपछि आगो राम्रोसँग निभाएर मात्र फाल्न आग्रह गरिएको छ। त्यस्तै, घरमा प्रयोग हुने बिजुलीका तार, स्विच, प्लग तथा वायरिङ नियमित जाँच गर्न र बिग्रिएको अवस्थामा तुरुन्त मर्मत गर्न पनि प्रशासनले सुझाएको छ।
मल्टिप्लग, पानी तताउने जग, टेलिभिजन, पंखा तथा अन्य विद्युतीय उपकरण प्रयोग सकेपछि बन्द गर्नुपर्नेमा पनि जोड दिइएको छ। सलाई, लाइटर, राँको तथा टुकीबत्ती बालबालिकाले सजिलै भेट्ने स्थानमा नराख्न र घरमा रहेका प्रज्ज्वलनशील पदार्थ जस्तै मट्टितेल, पेट्रोल र डिजेल सुरक्षित स्थानमा राख्न पनि प्रशासनले आग्रह गरेको छ।
प्रमुख जिल्ला अधिकारी लिला कुमारी के.सी. पाण्डेका अनुसार खेतबारी तथा वनजंगलमा अनावश्यक रूपमा आगो नलगाउन सबैलाई सचेत रहन आग्रह गरिएको छ। आगलागी भएको थाहा पाएलगत्तै छरछिमेकसँग सहयोग माग्न तथा दमकल र प्रहरीलाई खबर गर्न पनि प्रशासनले अनुरोध गरेको छ। आगो नियन्त्रणका क्रममा बालबालिका, सुत्केरी महिला, ज्येष्ठ नागरिक तथा अपाङ्गता भएका व्यक्तिलाई प्राथमिकतामा राख्नुपर्नेमा पनि जोड दिइएको छ।
परम्परागत खेती प्रणालीअन्तर्गत पातपतिङ्गर जलाएर मल बनाउने वा किरा–फट्याङ्ग्रा मार्ने उद्देश्यले लगाइने आगोका कारण पनि ठूला आगलागीका घटना हुने गरेको प्रशासनले जनाएको छ। यसले वनको पारिस्थितिक प्रणालीमा नकारात्मक असर पार्दै मानव जीवनलाई समेत संकटमा पार्न सक्ने भएकाले यस्ता कार्य नगर्न प्रशासनले सबैलाई सचेत गराएको छ।
Discussion about this post