फागुन २७, सोलुखुम्बु , सोलुदुधकुण्ड नगरपालिका वडा नम्बर ६ ले बेनी हाइड्रोपावर लिमिटेडले निष्कासन गर्ने स्थानीय सेयरमा आफ्नो वडालाई पनि अति प्रभावित क्षेत्रको सूचीमा समावेश गर्न माग गरेको छ।
वडा कार्यालयले कम्पनीलाई पत्र पठाउँदै हाल बेनी हाइड्रोपावरले सोलुदुधकुण्ड नगरपालिका वडा नम्बर २, ३ र ४ लाई मात्र अति प्रभावित क्षेत्रका रूपमा तोकेको तर वडा नम्बर ६ लाई भने बेवास्ता गरिएको भन्दै आपत्ति जनाएको छ।
परियोजनाको राष्ट्रिय प्रसारण लाइन विस्तारका क्रममा वडा नम्बर ६ को खोरिया क्षेत्र हुँदै लाइन लैजाने र सोही आधारमा वडा नम्बर ६ लाई पनि अति प्रभावित क्षेत्रका रूपमा समावेश गर्ने विषयमा कम्पनीका प्रतिनिधिसँग मौखिक सहमति भएको वडा अध्यक्ष फुर्वा ग्याल्जेन शेर्पाले बताउनुभयो।
तर उक्त सहमति कार्यान्वयन नभएको भन्दै वडा कार्यालयले औपचारिक पत्रमार्फत कम्पनीको ध्यानाकर्षण गराएको हो। मौखिक सहमतिलाई कार्यान्वयन नगरेमा थप कडा पहल गरिने चेतावनी पनि पत्रमार्फत दिइएको वडा अध्यक्ष शेर्पाले उल्लेख गर्नुभयो।
वडा कार्यालयले यदि यस विषयमा स्पष्ट जानकारी नदिइएमा तथा वडा नम्बर ६ लाई अति प्रभावित क्षेत्रको सूचीमा समेट्ने निर्णय नगरेमा आवश्यक परे चरणबद्ध रूपमा थप कदम चाल्न बाध्य हुने चेतावनी दिएको छ।
वडा अध्यक्षको हस्ताक्षरसहित पठाइएको उक्त पत्रमार्फत स्थानीय सरोकारका विषयमा ध्यान दिन र वडा नम्बर ६ लाई पनि स्थानीय सेयरको अति प्रभावित क्षेत्रका रूपमा समेट्न कम्पनीलाई आग्रह गरिएको छ।
Discussion about this post