हाइड्रोले जथाभावी पानी छाड्दा  लिखुपिके सल्लेरी सडक खण्ड अवरुद्ध 

साउन ४, सोलुखुम्बु  । सोलुखुम्बुको लिखुपिके गाउँपालिका लाई सदरमुकाम सँग जोड्ने मुख्य सडक लिखु खोलामा एक्कासि बढेको पानीको उच्च बहावले बगाइदिएको छ । स्थानीय हाइड्रो पावर हिमालयन इनर्जीले ड्याम खोल्दा लिखु खोलामा बढेको उच्च बहावले सडक बगेको हो ।  

गाउँपालिकालाई सिदा सदरमुकामसँग जोड्ने किन्जा भकान्जे लामाजुरा सल्लेरी सडक खण्ड अन्तर्गतको तुलाम सडक खण्डमा लिखु खोलामा आएको अत्याधिक पानीको बहावले बाटो बगाइदिएको बताइएको छ  ।  हाइड्रोको लापरवाहीका कारण पटक पटक पालिकाको सार्वजनिक सम्पत्तिमा क्षति हुनका साथै अन्य विभिन्न खालका समस्या आउने गरेको गाउँपालिका अध्यक्ष मिना कार्की बस्नेतले बताउनुभएको छ ।

उहाँले यस पटक पनि हाइड्रो पावरले सुरुङमा छाड्नु पर्ने पानी नछाडी ड्याम खोलामा फर्काइदिँदा गाउँपालिकालाई सदरमुकाम सँग जोड्ने एक मात्र सडक खण्ड बगाइदिएको बताउनुभयो । जानकारी सम्म नगराइृ मनोमानी ढंगले हाइड्रोले पानी छाडिदिँदा अहिले लिखुपिके गाउँपालिकाबाट सदरमुकाम विभिन्न कामका लागी आउने नागरिकहरू विचमै अड्किनुपरेकाे उहाँको भनाई छ  । यस अघि पनि हाइड्रोले मनोमानी ढङ्गले पानी छाड्दा जलाउँदै गरेको लास समेत बगाएको थियो ।

चरम लापरवाही पुर्ण काम गर्दै आएको हाइड्रोका कारण सार्वजनिक सम्पत्तिमा पुगेको क्षतिको जिम्मेवारी हाइड्रो अाफैले लिनुपर्नेमा अध्यक्ष बस्नेतको अडान छ ।  बाढीले सडकको करिव १ सय मिटर खण्ड बगाइदिएको छ भने सवारी साधन चल्ने त परै जावस मानिस सम्म हिड्‌न सक्ने अवस्था नभएको अध्यक्ष बस्नेतको भनाई छ ।