महाकुलुङमा ३३ जना विद्यार्थीलाई छात्रवृत्ति

साउन २३, सोलुखुम्बु । सोलुखुम्बुको महाकुलुङ गाउँपालिकामा ३३ जना विद्यार्थीलाई छात्रवृत्ति प्रदान गरिएको छ । बुधबार जुलियाना डि मार्ची पर एल नेपालको सहयोग, महाकुलुङ ४ निवासी ट्रेकिङ गाइड तेन्जी शेर्पाको समन्वय तथा पहाडी विकास तथा संरक्षण समूह नेपालले विद्यार्थीहरुलाई छात्रवृत्ति प्रदान गरेको हो ।

गुदेल माध्यमिक विद्यालयका १८ जना र छेस्काम माध्यमिक विद्यालयका १५ जना गरि जम्मा ३३ जनालाई छात्रवृत्ति प्रदान गरेको संवाददाता उदव कुलुङले जानकारी दिनुभयो । कम आयस्रोतको कारण स्कुल छोड्न बाध्य हुने विद्यार्थीहरुलाई लक्षित गरी “स्कलरसिप इन महाकुलुङ“ कार्यक्रम अन्तर्गत छात्रबृत्ति हस्तान्तरण गरिएको जनाईएको छ ।

उनीहरुलाई स्कुल ड्रेस सट, पाइन्ट, स्वीटर, ट्र्याक सुट, जुत्ता, झोला वर्षमा एक पटक र मासिक रूपमा क्रमिक रूपमा प्रत्येक विद्यार्थीलाई कापी र कलम मसलन्द उपलब्ध गराउने पहाडी विकासका अध्यक्ष भलाकाजी कुलुङले बताउनुभएको छ ।

साथै स्कुलमा अध्ययनको क्रममा लाग्ने सम्पुर्ण शुल्क पनि उपलब्ध गराउने जानकारी दिनुभएको छ । आज उक्त सामाग्री तथा नगद वितरणसंगै छात्रवृत्ति पाउने विद्यार्थीहरुको अभिभावकसंगको छलफलमा पहाडी विकासले अभिभावकहरुसंग थप सल्लाह सुझाव पनि संकलन गरेको छ ।

जसमा यो छात्रवृत्ति उपलब्ध नभएको भए आर्थिक अभावको कारण कक्षा ६ मा अध्ययनरत छोरालाई स्कुल छोडाउन बाध्य भएको तर छात्रवृत्ति उपलब्ध भएकै कारण छोराले निरन्तर पढ्न पाएको छेस्कामका सुमि रानी कुलुङले बताउनुभयो ।

छात्रवृत्ति पाएसँगै ३।३ महिनामा पहाडी विकासबाट स्कुल तथा विद्यार्थीको घरमा प्रत्यक्ष अनुगमन समेत हुने भएकोले धेरै प्रभावकारी रहेको छेस्काम माविका प्रधानाध्यापक गुरु प्रसाद राईले बताउनुभएको छ ।