सोताङ पञ्चकन्या मन्दिरलाई पुरातत्व विभागमा दर्ता गर्न अध्यक्ष बस्नेतको पहल 

साउन २४, सोलुखुम्बु  । सोलुखुम्बुको सोताङ गाउँपालिकामा रहेको पुरातात्विक मन्दिर संरक्षणका लागी गाउँपालिका अध्यक्ष खिलराज बस्नेतले पहल सुरु गर्नुभएको छ । गाउँपालिकाको वडा नम्बर १ र ३ को बिचमा रहेको पुरानो मन्दिर पञ्चकन्या देवीको मन्दिरलाई संरक्षण गर्नका लागी पुरातत्व विभागमा दर्ता गरिनुपर्ने माग राख्नु भएको छ ।

 उक्त मन्दिर संरक्षण गर्नुपर्ने माग सहितको निवेदन उहाँले पुरातत्व विभागकी महानिर्देशक सौभाग्य प्रधानाङ्गलाई भेटेर दिनुभएको जनाइएको छ ।  साथै यसका लागी संस्कृति पर्यटन तथा नागरिक उड्डयन मन्त्री बद्रि पाण्डेले पनि आवश्यक पहल गर्ने प्रतिबद्धता व्यक्त गर्नुभएको अध्यक्ष खिलराज बस्नेतको सचिवालयले जनाएको छ ।

१६ औँ शताब्दीदेखि आस्थाको केन्द्रको रुपमा स्थापित मन्दिरलाई पुरातत्व विभागमा दर्ता गरि पुरातात्विक क्षेत्रको रुपमा विकास गर्नुपर्ने आवश्यकता देखिएको भन्दै यसका लागी पालिका नेतृत्वको हैसियतले लागी परिरहेको अध्यक्ष कार्कीको भनाई छ ।

उक्त मन्दिरको पुनर्संरचनाका लागी डिपिआर तयार गरि मन्त्रालयमा बुझाइसकेको र यसको सुनवाई हुने आफूले विश्वास लिएको पनि अध्यक्ष बस्नेतको भनाई छ ।