सगरमाथा राजमार्गकाे भडाँरे खोलाको बाढीले सवारी अावागमन अवरूद्ध 

साउन २४, सोलुखुम्बु । ओखलढुङ्गाको मानेभन्ज्याङ गाउँपालिका वडा नम्बर ६ र ७ स्थित जयराम घुर्मी कटारी सडक अन्तर्गत सगरमाथा राजमार्गमा पर्ने भडाँरे खोलामा आएको बाढीका कारण माथिल्लो सगरमाथाका ३ जिल्लाका यातायात आवतजावत अवरुद्ध बनेको छ ।

विहीबार दिउँसो परेको वर्षापछि आएको खहरे बाढीले पूर्वी पहाडी यि ३ जिल्लालाई तराई तथा काठमाण्डौ सँग जोड्ने सडक सञ्जाल केही बेर अवरुद्ध बनेको थियो । माथिल्लो भेगमा परेको वर्षातका कारण आएको बाढीले काठमाडौँ तथा तराईका जिल्ला बाट सोलुखुम्बु, खोटाङ र ओखलढुङ्गा जाने सवारी साधन अलपत्र परेका थिए ।

खोलामा बाढी आएपछि पूर्वको पशुपतिनाथ भनेर चिनिने खोटाङको हलेसी महादेव मन्दिर हिँडेका बोलबम तीर्थयात्रीहरू अलपत्र परेका छन् ।  एक्कासि खोलामा आएको बाढीले खहरे बढ्नुका साथै सडक समेत बिगारेपछि काठमाण्डौबाट यि तिन जिल्लाका लागी हिँडेका सवारी साधन तथा तिन जिल्लाबाट काठमाण्डौ तथा अन्य जिल्ला हिँडेका सवारी साधन र यात्रु अलपत्र परेका थिए ।