ओखलढुंगामा अत्याधिक मादकपर्दाथ सेवन गरी नाबालक छोरालाई कुट्पिट गर्ने बुबा पक्राउ

साउन २५, सोलुखुम्बु । ओखलढुंगामा नाबालक छोराहरुलाई शारीरिक याताना दिने गरेको आरोपमा एक पुरुष पक्राउ परेका छन् । जिल्लाको खिजीदेम्बा गाउँपालिका वडा नम्बर ९ मा नाबालक छोराहरुलाई शारीरिक याताना दिने गरेको भन्दै बुवा पक्राउ परेका हुन ।

पक्राउ पर्नेमा खिजीदेम्बा ९ का फुरीन्जी शेर्पा रहेका छन् । उनले लामो समयदेखि आफ्ना ६ वर्षिय र ४ वर्षिय दुई नाबालक छोराहरुलाई चरम शारीरिक यातना दिदैँ आएको थाहा पाएपछि प्रहरीलाई खबर गरिएको वडाअध्यक्ष ङ्वाङफुरी शेर्पाले जानकारी दिए ।

खबर पाएपश्चात आज रातीनै उनकै घरबाट शेर्पालाई पक्राउ गरिएको जिल्ला प्रहरी कार्यलय ओखलढुंगाले जनाएको छ । शेर्पाले अत्याधिक मादकपर्दाथ सेवन गरि बालकहरुलाई बाधेँर, झुन्ड्याएर, चुलोमा तातो पानीमा बसालेर समेत यातना दिने गरेको खुल्न आएको छ ।

केही वर्ष पहिलादेखि नै शेर्पाको एउटा बच्चा बेपत्ता रहेको समेत स्थानियले बताएका छन् । शेर्पाले उनकी श्रीमतीलाई समेत यस्तै चरम शारिरीक यातना दिँदै आएकाले हाल बालकहरुकी आमा अर्थात शेर्पाकी श्रीमती प्रदेश पलायन भएको समेत बुझिएको छ ।

वडाअध्यक्ष शेर्पाकाअनुसार आमा विदेश गएको एक वर्षदेखि बालकहरु हजुरआमासँग बस्दै आएकोमा गत जेठदेखि उनका बुवाले आफुसँग राखेर यातना दिन थालेको बुझिएको छ । बुबाको पक्राउपश्चात हाल बालकहरु हजुरआमाको साथमा रहेको र बाघटनाबारे थप अनुसन्धान भइरहेको जिल्ला प्रहरी कार्यलय ओखलढुंगाका सुचना अधिकारी विजय कार्कीले जानकरी दिनुभयो ।