भयावह आगलागीमा निरिह प्राणी, उजाडियो घर, जले रहर

बैशाख १९, साेलुखुम्बु । थुलुङ दुधकोसी गाउँपालिका वडा नम्बर ३ पन्चनमा बुधबार आगलागीबाट ३ घर सहित १ गाई गोठ र बाख्राको खोर जलिसकेका छन । आगलागीबाट घर, गाइगोठ र बाख्राखोर नै जलेपछि के नै बाँकी रह्यो र हैन ?, यतिखेर सोलुखुम्बु जलिरहेको छ । केही दिन अघि मात्रै देउपुजे जलेर सेलाइनसकी फेरी उता पन्चन जल्दा सोलुखुम्बुको आकासमा धुवाँ मडारिरहेको छ ।  हावाहुरी, चर्को घाम सहन नसक्नु भएका बेला घाम छेक्ने घर, हावा छल्ने मतान, गाई बाँध्ने गोठ, बाख्रा बाँध्ने खोर सँगै बस्तुनै जलेपछि घर भन्दा बढी किसानको मन दनदन बलिरहेको छ ।  गरिखाने मान्छेको गरिखाने भाडो हरायो । लालाबाला हुर्काउने घर हरायो र उजाडियो जिन्दगीनै । बर्सेनि आगलागीबाट मात्रै करोडौँको क्षति हुन्छ । तर यो विपत्ति बेवास्ता गरिएको विपत्ति भएरै त होला न कुनै निकायले नियन्त्रणको योजना बनाउँछ न पूर्व तयारी गर्छ । सायद आँसुले आगो निभाउँथ्यो भने पीडितका आँसु सुक्ने थिएनन्, गोठमा सितल तापेर बसेका ति निरिह पशुको छालाले आगो छेक्थ्यो भने सायद आधा पोलिएर बाच्नु पर्दैनथ्यो । जङ्गलमा आगो लगाउन जति सजिलो छ त्यसले निम्त्याउने विपत्तिको चोट पुरिन त्यति कठिन । त्यसैले आगो लगाउनुभन्दा अगाडि जलेका घर र मन सोचौँ ।