बजेटका लागि सोताङ पालिका अध्यक्ष बस्नेतले गरे आधा दर्जन मन्त्रिको ध्यानाकर्षण

सोलुखुम्बु,बैशाख १९ ।  सोलुखुम्बुको सोताङ गाउँपालिका अध्यक्ष खिलराज बस्नेतले पालिका र जिल्लाको विकासका लागि बजेट तथा कार्यक्रममा समेट्न आधा दर्जन मन्त्रिहरूको ध्यानाकर्षण गराउनु भएको छ । सिंहदरबारमा संघिय मन्त्रिहरुलाई छुट्टाछुट्टै भेटेर अध्यक्ष बस्नेतले विषयगत क्षेत्रका मागहरू राख्नु भएको हो । 

अध्यक्ष बस्नेतले शिक्षा, विज्ञान तथा प्रविधि मन्त्री सुमना श्रेष्ठ सँग भेट गरी सोताङ गाउँपालिकामा  अनुदान मार्फत  निमावि र मावि शिक्षक दरबन्दीको व्यवस्थापनको लागि तथा पालिकाको नमुना विद्यालय बिरेन्द्र ज्योति माविमा कक्षा ९ देखी सञ्चालन हुँदै आएको कृषि विषय अध्ययनमा भेटेरिनरी विषय  पनि थप गरि भेटेरिनरी विषय अध्ययन अध्यापन गर्न अनुमति, कार्यक्रम तथा बजेट व्यवस्थापन गर्न आग्रह गर्नु भएको हो । साथै उहाँले कानून, न्याय तथा संसदीय मामिला मन्त्री गिरी सँग भेट गरि जिल्ला अदालत भवन जीर्ण अवस्थामा रहेकाले भवन पुनर्निर्माणका लागि बजेट व्यवस्थापन गर्न माग गर्नु भएको हो । 

कार्यपालिका बैठकको निर्णय बोकेर सिंहदरबार पुगेका अध्यक्ष बस्नेतले गृह मन्त्रालय र अर्थ मन्त्रालयमा  विभिन्न सुरक्षा निकायका भवन निर्माण  लागि आवश्यक बजेट व्यवस्थापन गर्न निवेदन पेश गर्नु भएको हो ।  त्यस्तै महिला, बालबालिका तथा ज्येष्ठ नागरिक मन्त्री भगवती चौधरी  सँग भेट गरि  महिला, बालबालिका तथा ज्येष्ठ नागरिकहरूको क्षेत्रमा विविध कार्यक्रमहरू अन्तर्गत सीप विकास उद्यमी तथा सशक्तीकरण, बाल संरक्षण र  ज्येष्ठ नागरिक तथा अपाङ्गता भएका व्यक्ति हरूको लागि कार्यक्रम सञ्चालन गर्न आवश्यक बजेट व्यवस्थापन गर्न प्रस्ताव सहित निवेदन गर्नुभएको छ । भेट पछि मन्त्रिहरुले माग सम्बोधन गर्ने प्रतिबद्धता जनाएको अध्यक्ष बस्नेतले प्रतिक्रिया दिनुभयो ।