“ऐसेलुखर्क गाउँपालिका प्रथम अध्यक्ष कप“ को प्रथम उपाधि पुरुष तर्फ दमक र महिला तर्फ आमचोक भोजपुरले उठायो 

बैशाख ३१, सोलुखुम्बु । खोटाङको ऐसेलुखर्क गाउँपालिकामा आयोजित “ऐसेलुखर्क गाउँपालिका प्रथम अध्यक्ष कप“ को प्रथम उपाधि पुरुष तर्फ दमक नगरपालिका झापा  र महिला तर्फ आमचोक गाउँपालिका भोजपुरले हात पारेका छन ।  आइतबार सम्पन्न अन्तर पालिका स्तरीय खुल्ला महिला तथा पुरुष तर्फको उपाधि पुरुष तर्फको षडानन्द गाउँपालिका भोजपुरलाई हराउँदै दमकले हात पारेको हो भने महिला तर्फ केपिलासगढी गाउँपालिका खोटाङलाई हराउँदै आमचोक गाउँपालिका भोजपुरले हात पारेको हो ।

खेलकुद विकास समिति ऐँसेलुखर्कको आयोजना तथा ऐसेलुखर्क गाउँपालिका खोटाङको प्रायोजनमा सम्पन्न प्रतियोगितामा पुरुष तर्फ १३ र महिला तर्फ ४ टिमको सहभागिता रहेको खेलकुद विकास समिति ऐसेलुखर्कले जनाएको छ । प्रतियोगिताको पुरुष तर्फको द्वितीय, तृतीय र सान्त्वना पुरस्कार क्रमशः षडानन्द गाउँपालिका भोजपुर, सोताङ गाउँपालिका सोलुखुम्बु र सिद्धिचरण नगरपालिका ओखलढुङ्गाले हात पारेका छन भने महिला तर्फको द्वितीय, तृतीय र सान्त्वना पुरस्कार क्रमशः केपिलासगढी गाउँपालिका खोटाङ, आयोजक खेलकुद विकास समिति ऐसेलुखर्क र ऐसेलुखर्क गाउँपालिका वडा नम्बर ३ ले हात पार्न सफल भएका छन ।

 प्रतियोगितामा विजेता सबै टिमले समान पुरस्कार क्रमशः २ लाख, १ लाख, ५० हजार र २५ हजारको साथमा शिल्ड मेडल र प्रमाणपत्र प्राप्त गरेको खेलकुद विकास समिति ऐसेलुखर्कका अध्यक्ष रजिन राईले जानकारी दिनुभयो । यसैबीच खोटाङको ऐसेलुखर्क गाउँपालिकाले अल्ट्रा धाविका प्रिया राई र निर्मला राई सँगै गाउँपालिकाको तर्फबाट नेपाल पुलिस क्लबकी खेलाडी शान्तिकला तामाङलाई जनही २५ हजार रुपैयाँका साथ प्रमाणपत्र सहित सम्मानित गरेको छ ।

 विजेता टिम तथा धाविका हरुलाई ऐसेलुखर्क गाउँपालिकाका अध्यक्ष गिरेन्द्र बहादुर राई, उपाध्यक्ष राजेशराज भण्डारी र प्रमुख प्रशासकीय अधिकृत रेख बहादुर थापा तथा वडा अध्यक्षहरु र समितिका अध्यक्ष रजिन राईले संयुक्त रुपमा पुरस्कार वितरण गर्नुभएको जनाइएको छ । पहिलो पटक ठुलो पुरस्कार राशि सहित अध्यक्ष कपको आयोजना गरेको गाउँपालिकाले गाउँपालिकामा खेलाडी उत्पादनमा यो प्रतियोगिता कोशेढुङ्गा सावित भएको अध्यक्ष गिरेन्द्र बहादुर राईले बताउनुभयो । उहाँले खेल र खेलाडीको प्रवर्द्धनमा गाउँपालिका पछि नहट्ने पनि जिकिर गर्नुभएको छ ।  गत बैशाख २६ गतेबाट हुने भनिएको प्रतियोगिता पानी परेपछि एक दिन ढिला गरि सुरु भएको थियो भने निर्धारित समयभन्दा १ दिन ढिला गरि आइतबार ३० गते सम्पन्न भएको हो । 

• यो समाचार पढेर तपाँईलाई कस्तो लाग्यो ?