काँगेलमा सुरु भयो अचार बनाउने तालिम 

मंसिर २६, सोलुखुम्बु । सोलुखुम्बुको थुलुङ दुधकोशी गाउँपालिका वडा नम्बर २ काँगेलमा अचार बनाउने तालिम सुरु भएको छ ।  घरेलु तथा साना उद्योग कार्यालय सोलुखुम्बुको आयोजना तथा वडा कार्यालय काँगेलको समन्वयमा एक हप्ते अचार बनाउने तालिम सुरु भएको हो ।

 बुधबार बाट एक हप्ता सम्म चल्ने तालिममा कृषिजन्य कच्चा पदार्थमा आधारित अचार बनाउने तालिममा स्थानीय स्तरमा पाइने कच्चा पदार्थ प्रयोग गरि अचार बनाउन सिकाइने जनाइएको छ । घरेलु तथा साना उद्योग कार्यालय सोलुखुम्बुका प्रमुख नारायण प्रसाद खतिवडाको प्रमुख आतिथ्यता एवं वडा अध्यक्ष यूजन बस्नेतको अध्यक्षतामा सम्पन्न एक कार्यक्रमका बीच अचार बनाउने तालिमको उद्‌घाटन गरिएको छ ।  तालिमले सहभागीहरूलाइ स्थानीय सामाग्रीहरू जस्तै अाँप, मुला, गुन्द्रुक, सिन्की लगायत घरायसी सामाग्री प्रयाेग गरि अचार बनाउन सक्ने सिप प्रदान गर्ने अध्यक्ष बस्नेतले बताउनुभयाे । 

अचार बनाउने तालिमले स्थानीय नागरिकलाई आयआर्जन सँगै स्थानीय सामाग्रीको सदुपयोगका सहयोग पुग्ने वडा अध्यक्ष बस्नेतले बताउनुभयो । उहाँले महिलाहरूको उद्यमशीलता बढाउँदै आत्मनिर्भरताको लागी याे कार्यक्रम प्रभावकारी हुने दावी गर्नुभयो ।  

यस्तै कार्यालय प्रमुख तथा प्रमुख अतिथि खतिवडाले कार्यालयको वार्षिक स्वीकृत कार्यक्रम अनुसार यस्तो तालिम आयोजना गरिएको बताउँदै जिल्लामा सबै ठाउँमा स्वरोजगारी बढाउन कार्यालयले बजेट व्यवस्थापन गरि काम गरिरहेको उल्लेख गर्नुभयो । तालिम उद्घाटनमा वडाका जनप्रतिनिधि, स्थानीय उद्यमी लगायत सरोकारवालाहरूको उपस्थिति रहेको थियो ।