वृहत खोटाङ हलेसी महोत्सवको कविता प्रतियोगितामा “बिर्खे दमाइको आवाज” प्रथम 

जेठ ३, साेलुखुम्बु । खोटाङमा जारी प्रथम वृहत खोटाङ हलेसी खेलकुद,साहित्यिक, साङ्गीतिक, तथा पर्यटन महोत्सव अन्तर्गत आयोजित कविता प्रतियोगितामा सुनसरीका कवि किरण सिवाको कविता विर्खे दमाइको आवाज प्रथम भएको छ । आज जिल्लाको हलेसी तुवाचुङ नगरपालिकामा सम्पन्न प्रतियोगितामा सिवाको कविता प्रथम भएको छ ।

दर्ता भएका मध्ये वाचन का लागी १६ कविता छनौट भएका थिए । १६ वटा कविताबाट प्रतिष्पर्धा हुँदा उनको कविता प्रथम भएको आयोजक खेलकुद विकास प्रतिष्ठान खोटाङका अध्यक्ष सञ्जय कुमार राइृले जानकारी दिनुभयो । यस्तै प्रतियोगितामा भोजपुरका संग्राम किरातीको कविता बाध्यता की रहर दोश्रो भएको छ ।  यस्तै उदयपुरका जीवन चाम्लिङ राईको कविता भरिया दाइ तेश्रो भएको छ भने सिन्धुलीका बाबुराम श्रेष्ठ यात्रीको कविता छम्कली रोकाया चौथो र भोजपुरका कवि सकिला राईको कविता पाँचौ भएको अध्यक्ष राईले जनाउनुभएको छ ।

प्रतियोगितामा प्रथम, द्वितीय, तृतीय, चौथो र पाँचौ हुने कविताले पुरस्कार राशि क्रमशः ४० हजार, २५ हजार, १७ हजार, ११ हजार, र ७ हजारको साथमा पदक र प्रमाणपत्र प्राप्त गर्ने आयोजक खेलकुद प्रतिष्ठानले जनाएको छ ।  यसैबीच आजै कविताका शिखर पुरुष जसराज किराँतीलाई पनि सम्मान गरिएको छ । उहाँलाई हलेसीमा आयोजित कविता प्रतियोगिताको अवसरमा ११ हजार १ सय ११ रुपैयाँ सहित दोसल्ला अाेडाएर ताम्रपत्र प्रदान गररी सम्मान गरिएको आयोजकले जनाएको छ ।