एकता बचत तथा ऋण सहकारी संस्थाको १४ औं वार्षिक साधारणसभा सम्पन्न 

पौष १३, सोलुखुम्बु ।  सोलुखुम्बुको महाकुलुङ गाउँपालिका ३ छेस्काम स्थित एकता बचत तथा ऋण सहकारी संस्था लिमिटेडको १४ औं वार्षिक साधारणसभा सम्पन्न भएको छ । सनिवार छेस्काम माध्यमिक विद्यालयको सभा हलमा महाकुलुङ गाउँपालिकाकी उपाध्यक्ष बिपना कुलुङको प्रमुख आतिथ्यतामा साधारणसभा सम्पन्न भएको हो ।  साधारणसभाको क्रममा महाकुलुङ गाउँपालिकाको वडा नं ३ र वडा नं २ लाई कार्यक्षेत्र बनाएर सञ्चालन भइरहेको यस सहकारीको २ करोड ३२ लाख १९ हजार ४०८ रुपैयाँ ०६ पैसा बराबरको  वित्तिय प्रतिवेदन सहकारी सञ्चालक समिति सचिव गोम बहादुर कुलुङले प्रस्तुत गर्नुभएको थियो ।  

उहाँका अनुसार हालसम्म यस सहकारीमा जम्मा ६१६ जना सेयर सदस्य रहेका छन् ।  कार्यक्रमका प्रमुख अतिथि कुलुङले गाउँ गाउँमा सहकारी शिक्षा पुगेको कारण घरघरमा बचत गर्ने बानीको विकास भएको भन्दै सहकारीको स्थापना भएका पछि छेस्कामबासीको आर्थिक स्तरमा सुधार आउनुका साथै यहाँका महिलाहरूको दैनिकीमा निकै टेवा पुगेको बताउनुभएको छ ।  त्यस्तै कार्यक्रमका अतिथि तथा महाकुलुङ ३ का वडा अध्यक्ष दुर्गा बहादुर कुलुङले देशमा हाल केही सहकारीका कारण समग्र सहकारी क्षेत्रले बद्नामीको सामना गरिरहनु परेको भन्दै उक्त विषयबाट सचेत भएर पाठ सिक्दै सेवामूलक ढङ्गबाट सहकारीले काम गर्नुपर्ने उल्लेख गर्नुभयो ।

 कार्यक्रममा सहकारीका अध्यक्ष भलाकाजी कुलुङ्गले गाउँमा निष्क्रिय रहेको आर्थिक गतिविधिलाई चलायमान बनाउँदै ससानो पुँजीलाई परिचालन गरि सदस्यहरूको सामाजिक तथा आर्थिक जीवन स्तर उकास्दै आजको अवस्थासम्म आइपुग्दा  निकै खुसीलागेको बताउनुभयो । साधारण सभामा  महाकुलुङ गाउँपालिका उपाध्यक्ष बिपना कुलुङको प्रमुख आतिथ्यता, सहकारीका अध्यक्ष अध्यक्ष भलाकाजी कुलुङको सभाध्यक्षलाई रहेको थियो पूर्व वडा अध्यक्ष डेक बहादुर कुलुङ, छेस्काम मा.वि. छेस्कामका वि.व्य.स. अध्यक्ष बिध्याराज कुलुङ लगायतका उपस्थिति रहेको संवाददाता उद्धव कुलुङले बताउनुभयो ।