थुलुङ दुधकोशीको १३ औँ अधिबेशन सकियो, महत्वपूर्ण ऐन तथा विधेयक पारित

माघ २२, सोलुखुम्बु । थुलुङ दुधकोशी गाउँसभाको १३औं अधिवेशन सकिएको छ । बुधबार थुलुङ दुधकोशी गाउँ सभाको तेह्रौं अधिवेशन सकिएको गाउँपालिका प्रवक्ता भोजराज कार्कीले जानकारी दिनुभयो ।
अधिवेशनले थुलुङ दुधकोशी प्रज्ञा प्रतिष्ठान ऐन २०८१ लगायत अन्य ऐन तथा कार्यविधी सहित कार्यपालिका बैठकको निर्णय अनुमोदन गरेको छ । आर्थिक वर्ष २०८१र०८२ को साउन देखि हाल सम्म कार्यपालिकाले गरेको निर्णय अनुमोदन गरेको थुलुङ दुधकोशी गाउँपालिकाले जनाएको छ ।

यस्तै सही अधिवेशनमा चालु आर्थिक वर्षका लागि बिनियोजित बजेट तथा शिर्षक समेत परिवर्तन गरेको छ । विभिन्न वडाले निर्णय गरि पेश गरेको रकमान्तर तथा शिर्षकान्तर अनुमोदन गरेको पनि प्रवक्ता कार्कीले जानकारी दिनुभयो । उहाँका अनुसार थुलुङ दुधकोशी गाउँपालिकाले हरेक महिना कार्यालिका बैठक र वर्षमा दुई वटा सभा नियमित बस्ने गरेको छ ।

सभाका अध्यक्ष असिम राईले सम्वृद्ध गाउँपालिका निर्माणका लागि सहयोग गर्ने सभा सदस्य सहित सबैलाई धन्यवाद ज्ञापन गर्नुभयो । यस्तै कार्यसूचि अनुसार प्रमुख प्रशासकीय अधिकृत प्रशन्न दीप राईले हाल सम्मको आर्थिक प्रगति प्रस्तुत गर्नुभएको थियो । प्रस्तुत प्रतिवेदन अनुसार गाउँपालिकाले हाल सम्म ४१ प्रतिशत बजेट खर्च गरिसकेको छ ।