साेलुमा जङ्गली जनवारबाट पशु तथा बालीमा क्षति व्यहोरेका पीडितको राहत भुक्तानीमा ढिलासुस्ती 

माघ २३, सोलुखुम्बु । जङ्गली जनावरको कारण मानवीय, पशु तथा बाली क्षति व्यहोरेका सोलुखुम्बुका पिडीतहरुले सरकारले दिने भनिएको राहत पाउनै ढिला हुने गरेको छ ।  जिल्लामा साउन यता भालु, चितुवा, रातो बाँदर जस्ता बन्यजन्तुका कारण क्षति व्यहोरेका पीडितहरूको राहत रकम सरकारी प्रक्रियाका कारण ढिलाई हुने गरेको हो ।  चालु आर्थिक वर्षको मात्रै नभएर गत आर्थिक वर्षमा क्षति व्यहोरेका पीडितहरूले पनि हाल सम्म राहत पाउन नसकेका हुन् । डिभिजन वन कार्यालय सोलुखुम्बुबाट राहत स्वरुप वितरण गर्नुपर्ने रकम चालु आर्थिक वर्षको हाल सम्म ४ लाख ९७ हजार रहेको डिभिजन वन कार्यालय सोलुखुम्बुका सूचना अधिकारी मनराज राईले जानकारी दिनुभयो ।

सो मध्ये जिल्लामा २०८१ जेठ ७ गते भालुको आक्रमणबाट घाइते भएका सोलुदुधकुण्ड नगरपालिका ११ का चन्द्र बहादुर खड्का र  २०८० साल पौष ५ गते भालुकै आक्रमणबाट घाइते भएका थुलुङ दुधकोशी गाउँपालिकाका एन्जल पुडासैनीले राहत पाएका छन् भने अन्य पशुधन तथा बालीनालीमा क्षति व्यहारेकाहरुको राहत रकम हाल सम्म प्रक्रियामै रहेको जनाइएको छ ।  भालुको आक्रमणबाट घाइते भएका खड्काले १ लाख ७७ हजार रकम उपचार खर्च स्वरुप पाएका छन् भने पुडासैनीले २ लाख रकम उपचार खर्च स्वरुप पाएका छन् । तर  पशु तथा बाली क्षति व्यहोरेका किसानको कुल १ लाख २० हजार रकम भुक्तानी हुन बाकी रहेको डिभिजन वन कार्यालय सोलुखुम्बुले जनाएको छ ।  

मानवीय क्षतिका लागी २ लाख सम्म, पशुधन क्षतिका लागी २० हजार रुपैयाँ र बाली क्षतिका लागी १० हजार रकम दिँदै आएको सरकारले १ वर्ष सम्म पनि भुक्तानी नदिँदा थप समस्या हुने गरेको पीडितहरू बताउँछन् ।  क्षतिको विवरण र कागजपत्र हेरेर सम्बन्धित डिभिजन वन कार्यालयले सिफारिस गर्ने र क्षतिपुर्तिको रकम क्षत्रीय वन निर्देशनालय धनकुटाले पाठाउने गरेकोमा निर्देशनालयले ढिलासुस्त गरिदिने गरेको हो ।  गत आर्थिक वर्षको पौष देखी चालु आर्थिक वर्षको साउन महिना सम्म क्षति व्यहोरेका किसानले राहत रकम पाउन नसकेका हुन ।