ओर्लाङघाटमा पूल निर्माणका लागी खुल्यो टेन्डर, के के छन्  टेण्डर भर्ने मापदण्ड ? 

माघ २४, सोलुखुम्बु ।  गत साउन ३२ गते हिमताल फुटेर आएको बाढीले क्षतिग्रस्त बनाएको मितेरी पुल पुनः निर्माणका लागी टेन्डर आह्वान भएको छ ।  सोलुखुम्बुको उपल्लो हिमाली बस्ती खुम्बुक्षेत्र र तल्लो सोलुखुम्बु जोड्ने ओर्लाङघाटमा निर्मित पुल बाढीले क्षतिग्रस्त बनाएपछि पुन:र्मिाणका लागी माघ २२ गते टेन्डर आह्वान गरिएको हो ।  बाढीका कारण पुल क्षतिग्रस्त भएपछि खुम्बु पासाङ ल्हामु गाउँपालिका क्षेत्र सिधा सडक सञ्जालबाट विच्छेद भएको थियो । भलै हाललाई ह्युम पाइप राखेर सडक सञ्चालन गरिएको भएपनि पुल नहुँदा बर्खायाममा खुम्बु क्षेत्रमा यातायात अवरुद्ध हुने निश्चित प्रायः छ ।  सोही अवस्थालाई हेर्दै माप्य दुधकोशी गाउँपालिका र खुम्बु पासाङ ल्हामु गाउँपालिकाको लागत साझेदारीमा निर्माण हुने गरि पुलको टेण्डर आह्वान भएको जनाइएको छ ।

 जिल्ला सदरमुकामबाट ३४ किलोमिटर टाढाको दूरीमा रहेको ओर्लाङघाटमा पुल निर्माण भएपछि सल्लेरी खुम्बु सडक यातायात सहज रुपमा सञ्चालन हुने छ ।  विश्वकै प्रमुख पर्यटकीय गन्तव्य खुम्बु क्षेत्र भित्रने नाकाको रुपमा रहेको ओर्लाङघाटमा रहेको पुल बाढीले बगाएपछि पर्यटन क्षेत्र सँगै माथिल्लो क्षेत्रका नागरिकलाइृ ठुलो घाटा लागेको थियो । अव निर्माण हुने पुलको भौगर्भिक अध्ययन गरेर हाल रहेको पुलभन्दा करिब ३ सय मिटर उत्तरतर्फ स्थानान्तरण गरेर पुल निर्माण गर्ने तयारीसहित टेण्डर आह्वान गरिएको हो ।

अब बन्ने पुलको डिपिआर तयार भइसकेको छ ।  जेकेआर कन्सल्टेन्सी प्रालि नामक कम्पनीले तयार गरेको डिपिआर अनुसार ४८ मिटर लम्बाई, चौडाइ ५.५ मिटर र उचाइ १० मिटर (फाउण्डेशनभन्दा माथिको भाग) हुने माप्य दुधकोशी गाउँपालिकाका प्राविधिक शाखा प्रमुख इन्जिनियर जोनाथन राईले जानकारी दिनुभयो । नयाँ पुलको संरचनालाई दीर्घकालीन र दह्रो बनाउनका लागि हरेक क्षेत्रबाट ध्यान दिएर काम गरिने बताउनुभयो । नदीमा बग्ने पानीको बहावको साविक लेभलबाट चट्टान काटेर ९ मिटरभन्दा माथि पुलको जग निर्माण हुने छ । फाउण्डेसन भन्दा १० मिटरमाथि उचाइमा पुलको संरचना निर्माण गरिने छ । उहाँका अनुसार अब बन्ने पुलमा पुरानो पुलको सुपरस्ट्रक्चर (स्टीललगायत) पुनः प्रयोगमा ल्याइनेछ ।

गाउँपालिकाले खुलाएको टेन्डर अनुसार पुल निर्माणका लागी वार्षिक ७ करोड ८० लाख माथि आम्दानी भएको र कम्तीमा एकवटा पुल निर्माण गरिसकेको निर्माण कम्पनीले टेन्डर भर्न पाउने छन् ।  टेन्डर भर्दा कम्पनीले १२ लाख ८० हजार धरौटी राख्नु पर्ने छ । यथाशीघ्र पुल निर्माण गरेर यातायात सञ्चालनका लागी गाउँपालिका जोडतोडका साथ लागिपरेको माप्य दुधकोशी गाउँपालिकाका अध्यक्ष बुद्धिकिरण राईले बताउनुभयो ।