माघ २६, सोलुखुम्बु । सोलुखुम्बुको सोलुदुधकुण्ड नगरपालिका ६ दोर्पु बजार ढलानको अनुगमन गरिएको छ । नगरप्रमुख नाम्गेल जाङबु शेर्पाले शनिबार बिहान बजार ढलान कार्यको अनुगमन गर्नुभएको हो । दोर्पुबजार जेरो प्वाइन्टबाट नयाँबजार सम्मको ढलान कार्यको मेयर शेर्पा सहित प्रमुख प्रशासकीय अधिकृत टुक्ती शेर्पाले अनुगमन गर्नुभएको हो । सघन ुहरी तथा भवन निर्माण आयोजना अन्तर्गत भइरहेको बजार ढलान कार्यको अनुगमन गर्दै मेयर शेर्पाले ढलान कार्य दीर्घकालीन भएका पाइएको बताउनुभयो । अनुगमनका क्रममा मेयर शेर्पाले निर्माण पक्षका इन्जिनियर तथा निर्माण कम्पनीलाई दीर्घकालीन काम गर्न निर्देशन दिँदै समयमै काम सकेर नागरिकलाई सहज आवतजावतको व्यवस्था मिलाउनुपर्नेमा जोड दिनुभएको छ ।
अनुगमनका क्रममा नगरपालिकाका प्रमुख प्रशासकीय अधिकृत टुक्ती शेर्पाले बजार ढलान बजारबासीका लागी मात्रै नभएर नगरवासी समग्रका लागी राम्रो काम भएकाले गुणस्तरीय काम हुनुपर्नेमा जोड दिनुभएको छ । उहाँले बजारक्षेत्रलाई व्यवस्थीत बनाउन नगरपालिका लागी परेको भन्दै नगरका हरेक वडाको विकासलाई उत्तिकै प्राथमिकतामा राखिएको उल्लेख गर्नुभयो ।
सोलुदुधकुण्ड नगरपालिकाका प्रवक्ता तथा वडा नम्बर ६ का अध्यक्ष फुर्वा ग्याल्जेन शेर्पाले वडा भित्रको विकासलाई आफूले नजिकबाट नेतृत्व गरिरहेको भन्दै बजारभित्रको सडक ढलान कार्य प्रभावकारी भएको उल्लेख गर्नुभयो । उहाँले इन्जिनियर सहितको टिमलाई कार्यस्थलमै राखेर गुणस्तरमा खबरदारी गर्दै काम भइरहेकाले बजारवासीले पनि सडक ढलानको काम प्रति गुनासो नगरेको उल्लेख गर्नुभयो । वडा भित्रका सडकलाई व्यवस्थित बनाउन क्रमशः काम गर्दै जाने पनि उहाँको भनाई छ ।
सडक ढलान कार्यबाट बजारवासी पनि निकै खुसी छन । स्थानीयले बजार ढलान भएपछि सडक दुर्घटना र अन्य जोखिम टरेको भन्दै खुसी व्यक्त गरेका छन् । सघन सहरी तथा भवन निर्माण आयोजनाको फिल्ड युनिटले निर्माणस्थलमै कार्यालय स्थापना गरेर कामको रेखदेख गरिरहेकोले ढलान कार्यको गुणस्तरमा सम्झौता नगर्ने बताएको छ । दोर्पू पुरानो बजार जेरो प्वाइन्टदेखि नयाँ बजार जेराे प्वाइन्ट सम्मको करिव ६ सय ४० मिटर सडक ढलान भइरहेको कार्यालयको फिल्ड युनिटले जनाएको छ । ६ सय ४० मिटर भित्र ग्याभिन वाल सहितका संरचना डिपिआरमा भएको भएपनि कार्यालयले छरपस्ट तारलाई भूमिगत गर्ने गरि काम गरेको छ ।
Discussion about this post