नेचासल्यान राष्ट्रपती रनिङ शिल्ड : हिमाल दर्शनले चौथो पटक उचाल्यो उपाधि

माघ २६, सोलुखुम्बु ।  चौथो संस्करणको नेचासल्यान गाउँपालिका स्तरीय राष्ट्रपति रनिङ शिल्ड प्रतियोगिताको उपाधि हिमाल दर्शन माविले हात पारेको छ ।  गत २३ गतेबाट सुरु भएको गाउँपालिका स्तरीय चौथो राष्ट्रपति रनिङ शिल्डको उपाधि फेरी हिमाल दर्शन माध्यमिक विद्यालयले हात पारेको हो । शनिबार सम्पन्न रनिङ शिल्ड समापन समारोहका प्रमुख अतिथि तथा गाउँपालिका उपाध्यक्ष विना राईले विजेता विद्यालयहरूलाई पुरस्कार वितरण गर्नुभएको छ ।  

एक पटक शिल्ड पचाइसकेको हिमाल दर्शन माविले चौथोपटक शिल्ड उचालेको हो ।  माविले उच्चतम् ४३ पदक जित्दै शिल्ड आफ्नो बनाएको छ । ३४ पदक मध्ये हिमाल दर्शन माविले २१ स्वर्ण, ९ रजत र ४ काश्य जितेको छ ।  यस्तै प्रतियोगिताको दोश्रो स्थान गणेशथान माविले जितेको छ ।  उक्त माविले ८ स्वर्ण, १० रजत र ३ काश्य सहित  २१ पदक हासिल गर्दै दोश्रो भएको छ भने  तेश्रो स्थान केदार माविले हात पारेको छ ।  ५ स्वर्ण, ८ रजत र ६ काश्य सहित १९ पदक जित्दै माविले तेश्रो स्थान बनाएको हो ।

 यस्तै ३ स्वर्ण, ५ रजत र १४ काश्य सहित २२ पदक जित्दै चौथो,  २ स्वर्ण ३ रजत र ७ काश्य पदक सहित १२ पदक जित्दै विपी संस्कृत मावि पाँचौ र १ रजत र १ काश्य जित्दै भूमेश्वरी मावि अन्तिम भएको छ ।  निमित्त प्रमुख प्रशासकीय अधिकृत युवराज पोखरेलको सभापतित्व सम्पन्न रनिङ शिल्ड समापन कार्यक्रममा वडा नम्बर ५ का वडा अध्यक्ष, हिमाल दर्शन माविका प्रधानाध्यापक लाल प्रसाद बास्तोला, विव्यस अध्यक्ष ओम प्रसाद बास्तोला, लगायत सम्पूर्ण विद्यालयका प्र.अ तथा व्यवस्थापन समिति अध्यक्ष एवं विद्यार्थी लगायतको उपस्थिति रहेको थियो ।