निजामती कर्मचारी युनियन सोलुखुम्बुकाे नबाैँ जिल्ला अधिवेशन उद्‌घाटन, कसले के भने ?

माघ २६, सोलुखुम्बु ।  निजामती कर्मचारी युनियन सोलुखुम्बुको नबौँ अधिवेशन सम्पन्न भएको छ ।  नेपाली काङ्ग्रेसका जिल्ला सभापति एवं नगरप्रमुख नाम्गेल जाङ्बु शेर्पाको प्रमुख आतिथ्यतामा युनियनको अधिवेशन सम्पन्न भएको हो । जिल्ला सदरमुकाम स्थित धवलागिरी होटलमा जिल्ला अध्यक्ष दिने राईको अध्यक्षता तथा युनियनका केन्द्रिय सदस्यहरूको उपस्थितमा युनियनको अधिवेशनको उद्‌घाटन सत्र सम्पन्न भएको हो । नबौँ जिल्ला अधिवेशन सम्म आइपुग्दा जिल्लामा कर्मचारी युनियनको सङ्गठन वृद्धि भएको भन्दै वक्ताहरूले खुसी व्यक्त गरेका थिए ।

 कार्यक्रममा बोल्ने क्रममा प्रमुख अतिथि शेर्पाले कर्मचारीहरूको वृत्तिविकास हुनुपर्नेमा जोड दिनुभएको छ । उहाँले राजनीतिक दलको प्रमुखको हिसाबले जिल्लामा रहेका युनियनमा आवद्ध कर्मचारीहरूको हकहितका पक्षमा बोल्न वकालत गर्न पछि नहट्ने बताउनुभयो । निजामती कर्मचारीको ऐन संसद्मा विचाराधीन रहेको अवस्थामा त्यसलाई चाँडो पास गर्न केन्द्र सम्म कुरा गर्न पनि आफू तयार रहेका उहाँको भनाई थियो । उहाँले कर्मचारी संयन्त्रलाई भरपर्दो र जनमैत्री बनाउन युनियनले जोड दिनुपर्ने भन्दै युनियनबाटै कर्मचारीको पक्षमा वकालत हुन सक्ने विश्वास आम कर्मचारीमा दिलाउनुपर्नेमा केन्द्रित हुन आग्रह गर्नुभयो ।

 कार्यक्रममा युनियनका केन्द्रिय सदस्य अमृता कार्कीले कर्मचारीलाई पार्टी भित्रकै गुट उपगुटका कारण समस्या भएको भन्दै यसतर्फ पार्टीले पनि ध्यान दिनुपर्ने बताउनुभएको थियो । युनियन अधिवेशनमा सोलुदुधकुण्ड नगरपालिकाका उपमेयर गान्धीमाया तामाङ, वडा नम्बर ६ का अध्यक्ष तथा प्रवक्ता फुर्वा ग्याल्जेन शेर्पा, वडा नम्बर ७ का अध्यक्ष सोनाम ग्याल्जेन शेर्पा लगायतले वक्तव्य दिनुभएको थियो । बोल्ने वक्ताहरूले कर्मचारीले काम गर्दा जनमैत्री र पारदर्शी हिसाबले गर्नुपर्ने भन्दै स्थायी सरकार कर्मचारी संयन्त्र भएको उल्लेख गरेका थिए ।  यो समाचार तयार पार्दा सम्म युनियनको नयाँ ँ कार्यसमिति चयन प्रकृया अगाडि बढिरहेको छ ।