फेरिचे हेली दुर्घटना ः भारतीय नागरिक बसन्तको मृत्यु, पाइलटसहित तीन घाइते

कार्तिक १७,  सोलुखुम्बु । सोलुखुम्बुको खुम्बु पासाङल्हामु गाउँपालिका–४ स्थित फेरुचे हेलिप्याडमा दुई हेलिकप्टर आपसमा ठोक्किँदा एक भारतीय नागरिकको मृत्यु भएको छ भने दुवै हेलिकप्टरका पाइलटसहित तीन जना घाइते भएका छन् ।

मंगलबार बिहान करिब ८ बजेर ११ मिनेटमा फिस्टेल एयर र डाइनेस्टी एयरका हेलिकप्टर अवतरण गर्ने क्रममा आपसमा ठोक्किएर दुर्घटना भएको हो ।

प्रहरीका अनुसार दुर्घटनामा भारतको तमिलनाडु राज्य, चेन्नई निवासी अन्दाजी ४७ वर्षीय वसन्तकुमार बलरामुडुको घटनास्थलमै मृत्यु भएको हो । मृतकको शव प्रभु एयरको हेलिकप्टरमार्फत बिसुगार्ड, लुक्ला लगिएको छ ।

दुर्घटनामा फिस्टेल एयरका पाइलट रविन्द्र प्रजापति, डाइनेस्टी एयरका पाइलट प्रजल केसी र भारतीय मूलका न्युजिल्याण्डका नागरिक अन्दाजी ४९ वर्षीय सेलिशकुमार पटेल घाइते भएका छन् ।

घाइतेमध्ये पटेल र प्रजापतिलाई थप उपचारका लागि प्रभु एयरको हेलिकप्टरमार्फत ललितपुरस्थित मेडिसिटी अस्पताल ल्याइएको छ । डाइनेस्टी एयरका पाइलट प्रजल केसीको भने लुक्लास्थित निकोल निक्की अस्पतालमा उपचार भइरहेको र उनको अवस्था सामान्य रहेको प्रहरीले जनाएको छ ।

घटनाका सम्बन्धमा थप अनुसन्धान तथा आवश्यक कारबाही भइरहेको प्रहरीले जनाएको छ ।