सोलुखुम्बुमा भालुको आक्रमणबाट ७० वर्षीय वृद्ध गम्भीर घाइते

सबिना राई, कार्तिक १६, सोलुखुम्बु । सोलुखुम्बुमा भालुको आक्रमणबाट एक वृद्ध गम्भीर घाइते हुनुभएको छ । सोलुदुधकुण्ड नगरपालिका–६ स्थित वडा कार्यालय नजिकै सोमबार दिउँसो करिब ३ बजे भालुको आक्रमणबाट ७० वर्षीय निरकाजी मगर घाइते हुनुभएको हो । भालुको आक्रमणबाट मगरको टाउकोलगायत शरीरका विभिन्न भागमा चोट लागेको छ ।

घाइते मगरको हाल फाप्लु अस्पतालमा उपचार भइरहेको वडा अध्यक्ष फुर्वा ग्याल्जेन शेर्पाले जानकारी दिनुभयो । घाइतेको अवस्था गम्भीर रहेकाले थप उपचारका लागि मंगलबार हेलिकप्टरमार्फत काठमाडौं लैजाने तयारी गरिएको वडा अध्यक्ष शेर्पाले बताउनुभयो । साँझ परिसकेकाले तत्काल हेलिकप्टरमार्फत उद्धार गर्न सम्भव नभएपछि भोलिपल्ट रिफर गर्ने तयारी गरिएको उहाँको भनाइ छ ।

भालु वडा कार्यालय, धुलिखेल अस्पताल तथा छुल्यामु विद्यालय आसपासको जंगल क्षेत्रमा हुन सक्ने आशंका गरिएको छ । सम्भावित जोखिमलाई मध्यनजर गर्दै स्थानीयवासीलाई विशेष सतर्कता अपनाउन आग्रह गरिएको छ । विशेषगरी बालबालिका तथा ज्येष्ठ नागरिकलाई एक्लै घरबाहिर नपठाउन र रातिको समयमा अनावश्यक आवतजावत नगर्न स्थानीयवासीलाई सचेत गराइएको छ । भालुको सम्भावित उपस्थितिलाई ध्यानमा राख्दै आसपासका क्षेत्रका बासिन्दालाई सावधानी अपनाउन आग्रह गरिएको छ ।