छैठौँ नेचासल्यान गोल्डकप सुरु, उद्घाटन खेलमा जुनताराको शानदार जित

कार्तिक १५, सोलुखुम्बु । सोलुखुम्बुको नेचासल्यान गाउँपालिका–५ स्थित लाहुरे चौर खेल मैदानमा छैठौँ संस्करणको नेचासल्यान गोल्डकप सुरु भएको छ । प्रतिकूल मौसमका कारण एक दिन पछि सरेको प्रतियोगिता आइतबारदेखि औपचारिक रूपमा सुरु भएको हो । नेचासल्यान गाउँपालिकाको मुख्य प्रायोजन तथा वडा स्तरीय खेलकुद विकास समिति नेचासल्यान–५ को आयोजनामा सुरु भएको प्रतियोगिताको उद्घाटन गाउँपालिका उपाध्यक्ष बिना राईले गर्नुभएको हो ।

उद्घाटन समारोहलाई सम्बोधन गर्दै उपाध्यक्ष राईले नेचासल्यान गोल्डकप गाउँपालिकाको खेलकुद क्षेत्रको पहिचानका रूपमा स्थापित भएको बताउनुभयो । गाउँपालिका खेलकुदको उर्वर भूमि रहेको उल्लेख गर्दै उहाँले खेलाडीलाई उच्च मनोबलका साथ प्रतियोगितामा सहभागी हुन आग्रह गर्नुभयो । उहाँले प्रतियोगिता सौहार्दपूर्ण र अनुशासित वातावरणमा सम्पन्न हुने विश्वाससमेत व्यक्त गर्नुभयो । यस संस्करणको प्रतियोगितामा सोलुखुम्बु, ओखलढुंगालगायत विभिन्न जिल्लाका १२ टोली सहभागी छन् ।

नकआउट प्रणालीमा सञ्चालन हुने प्रतियोगिता नौ ए साइडमा खेलाइनेछ । प्रतियोगिताको विजेता टोलीले एक लाख ५५ हजार भने उपविजेताले ८५ हजार रुपैयाँ सहित दुबै टिमले ट्रफी, मेडल र प्रमाणपत्र प्राप्त गर्नेछन । त्यसैगरी सान्त्वना स्थान हासिल गर्ने दुई टोलीले जनही ३५ हजार रुपैयाँसहित प्रमाणपत्र प्राप्त गर्नेछन् ।

प्रतियोगिताको पहिलो दिन भएको उद्घाटन खेलमा जुनतारा क्लवले नेचासल्यान–३ लाई ६ का विरुद्ध शुन्य गोलले पराजित गर्दै विजयी सुरुवात गरेको रेफ्री क्षितिज तामाङले जानकारी दिनुभयो । वडा स्तरीय खेलकुद विकास समितिका अध्यक्ष आङसि हाङ राईको अध्यक्षतामा भएको उद्घाटन कार्यक्रममा गाउँपालिकाका विभिन्न वडाका अध्यक्षहरू, खेलप्रेमी, राजनीतिक दलका प्रमुख तथा प्रतिनिधि, दाता र शुभेच्छुकहरूको उपस्थिति रहेको थियो ।