खोटाङमा नेकपाको दुई महिने राष्ट्रिय जागरण अभियान सुरु

कार्तिक १५, सोलुखुम्बु । नेपाली कम्युनिस्ट पार्टी (नेकपा) ले संगठन निर्माण, अधिवेशन तथा आगामी निर्वाचनको तयारीलाई लक्षित गर्दै खोटाङमा दुई महिने राष्ट्रिय जागरण अभियान सुरु गरेको छ। पार्टीको केन्द्रीय कमिटीमा जिल्लाबाट प्रतिनिधित्व गर्ने केन्द्रीय सदस्य तथा प्रदेश कमिटी सदस्यहरूको कात्तिक १२ गते बसेको संयुक्त बैठकले अभियान सञ्चालन गर्ने निर्णय गरेको हो।

पार्टीले शुक्रबार जिल्ला पार्टी कार्यालय भवनगैरामा पत्रकार सम्मेलन गरी अभियानबारे जानकारी दिएको हो। अभियानको प्रारम्भमा राष्ट्रियता, जनजीविका, सुशासन र पारदर्शिताका विषय समेटिएको ज्ञापनपत्र प्रमुख जिल्ला अधिकारीमार्फत सरकारलाई बुझाइएको नेकपाले जनाएको छ। नेकपा खोटाङका सह–इन्चार्ज ललिन्द्र राईका अनुसार अभियान सञ्चालनका लागि केन्द्रीय सदस्यहरूको नेतृत्वमा प्रदेश कमिटी सदस्य तथा जिल्ला कमिटी सदस्यहरूलाई जिल्लाका १० वटै पालिकामा कार्यक्षेत्र विभाजन गरिएको छ। अभियानअन्तर्गत पालिका तथा वडा कमिटीका बैठक यथाशीघ्र आयोजना गरिनेछ।

अभियानका क्रममा वडा तथा पालिकास्तरमा तिहार विशेष कार्यक्रम, बाटोघाटो सरसफाइ तथा विभिन्न संगठनात्मक गतिविधि सञ्चालन गरिनेछ। त्यस्तै, जिल्ला स्कुल विभागको समन्वयमा दर्शनशास्त्र, अर्थशास्त्र, राजनीति, वर्तमान राजनीतिक उपलब्धि, आर्थिक निर्भरता, समसामयिक राजनीतिक घटनाक्रम र पार्टीको पथप्रदर्शक सिद्धान्तबारे प्रशिक्षण कार्यक्रम सञ्चालन गर्ने लक्ष्य राखिएको छ।

राष्ट्रियता, जनजीविका, जनअधिकार, सुशासन र पारदर्शिताको पक्षमा संघर्ष गर्ने तथा जनवर्गीय संगठन र मोर्चाहरूको भेला एवं कमिटी निर्माणलाई तीव्रता दिने कार्यक्रमसमेत अभियानमा समेटिएको छ। दुई महिने अभियानको अन्त्यमा निर्वाचन क्षेत्रस्तरमा समीक्षा बैठक आयोजना गरी आगामी कार्ययोजना निर्माण गरिने पार्टीले जनाएको छ।

यसैबीच, ग्रामीण विकास कार्यक्रमको अवधारणा निर्माणका लागि रामकुमार राई (पासाङ) को नेतृत्वमा कमल ढकाल र कविकुमार राई सदस्य रहेको समिति गठन गरिएको जानकारी दिइएको छ। बैठकले भोटेकोशी बाढीपीडितको सहयोगार्थ पार्टीका तर्फबाट ९४ हजार ७६८ रुपैयाँ प्रधानमन्त्री दैवी प्रकोप उद्धार कोषमा जम्मा गर्ने निर्णयसमेत गरेको छ।