सोलुखुम्बुमा भिटामिन ‘ए’ र जुकाको औषधि खुवाउने अभियान सुरु

कार्तिक १७, सोलुखुम्बु । हिमाली जिल्ला सोलुखुम्बुमा बालबालिकालाई भिटामिन ‘ए’ तथा जुकाको औषधि खुवाउने दुईदिने अभियान सुरु भएको छ । मंगलबारदेखि सुरु भएको अभियान बुधबारसम्म सञ्चालन हुने जिल्ला स्वास्थ्य कार्यालय सोलुखुम्बुले जनाएको छ। जिल्ला स्वास्थ्य कार्यालय सोलुखुम्बुका प्रमुख गंगाधर पण्डितका अनुसार राष्ट्रिय कार्यक्रमअन्तर्गत जिल्लाका लक्षित उमेर समूहका बालबालिकालाई भिटामिन ‘ए’ तथा जुकाको औषधि खुवाउन थालिएको हो ।

जिल्ला स्वास्थ्य कार्यालयका अनुसार गत वर्ष सोलुखुम्बुमा ४ हजार ७ सय ३० जना बालबालिकालाई भिटामिन ‘ए’ तथा ४ हजार १ सय ९९ जनालाई जुकाको औषधि खुवाइएको थियो । यस वर्ष पनि सोही हाराहारीमा बालबालिकालाई औषधि खुवाउने लक्ष्य रहेको कार्यालयले जनाएको छ । सरकारले देशभर ६ महिनादेखि ५९ महिनासम्मका बालबालिकालाई भिटामिन ‘ए’ तथा १२ महिनादेखि ५९ महिनासम्मका बालबालिकालाई जुकाको औषधि खुवाउने कार्यक्रम सञ्चालन गर्दै आएको छ ।

बालबालिकाको स्वास्थ्य तथा पोषण अवस्थामा सुधार ल्याउने उद्देश्यले हरेक वर्ष दुई चरणमा यो कार्यक्रम सञ्चालन गरिन्छ । यसअघि पहिलो चरणको कार्यक्रम हरेक वर्ष कात्तिक २ र ३ गते सञ्चालन हुँदै आएकोमा यस वर्ष दसैँको सार्वजनिक बिदाका कारण मिति परिवर्तन गरी कात्तिक १७ र १८ गते सञ्चालन गरिएको हो । कार्यक्रमको दोस्रो चरण सामान्यतया वैशाख ६ र ७ गते सञ्चालन हुने गरेको छ ।