सोलुखुम्बुमा दोश्रो पिके चौँरी पर्यटन महोत्सव हुँदै 

चैत्र ८, सोलुखुम्बु । सोलुखुम्बुमा दोश्रो पिके चौँरी पर्यटन महोत्सव हुने भएको छ ।  याक तथा चौँरी व्यवसायी सङ्घ नेपालले सोलुखुम्बुमा चौँरी महोत्सव गर्ने भएको हो ।  लाेपुन्मुख चौँरी पालन व्यवसायको संरक्षण तथा प्रवर्द्धन गर्ने उद्देश्यले आगामी बैशाख ७, ८ र ९ गते ३ दिन चौँरी पर्यटन महोत्सव हुने भएको हो ।  

सङ्घका अध्यक्ष तथा याक तथा चौँरी व्यवसायी महासङ्घ कोशी प्रदेशका सचिव थुतोप दोर्जे शेर्पाका अनुसार महोत्सव सोलुखुम्बुको प्रसिद्ध पर्यटकीय पिके क्षेत्रमा हुने छ । महोत्सवमा चौरीको प्रदर्शनका साथै स्थानीय खानाका परिकार, चौरीको दुधबाट बन्ने परिकारहरू जस्तै छुर्पी, घ्यू चिज, चमर लगायत प्रदर्शन एवं बिक्री का लागी राखिने छ ।  

महोत्सवले चौँरी पालन व्यवसायलाई प्रवर्द्धन गर्ने तथा चौँरी पालक किसानको उत्पादनलाई बजारीकरण गर्न मद्दत गर्ने अध्यक्ष शेर्पाको जिकिर छ ।  सोलुखुम्बुको सोलुदुधकुण्ड नगरपालिका १० टाप्टिङ, लिखुपिके गाउँपालिका र खिजीदेम्बा गाउँपालिकाको सिमानामा पर्ने लामुजेमा महोत्सव गर्ने तयारी रहेको सङ्घले जनाएको छ ।

 महोत्सवमा ओखलढुङ्गाको देम्बा लामुजे याक तथा चौँरी कृषक सङ्घ का साथै सोलुखुम्बुका उल्लेख्य चौँरीपालक व्यवसायी एवं कृषकहरूका गरि करिव १ सय ५० याक, नाक तथा चौँरीहरु जम्मा हुने आँकलन आयोजकले गरेको छ । लोपोन्मुख चौँरीपालन व्यवसायलाई जोगाइ राख्दै हिमाली पशुपालनको साख कायम राख्न यो महोत्सव अत्यन्तै सहयोगी बन्ने सङ्घको भनाई छ ।

 २०७७ सालमा स्थापना भएको सङ्घले जिल्लामा लोपोन्मुख चौँरी पालन व्यवसायलाई  पुस्तान्तरण गर्ने, व्यवसायीहरूको हकहितका लागी नीति नियम बनाउने निकायमा खबरदारी तथा दवाव दिने गरि काम गरिरहेको छ ।  साथै सङ्घले बैशाख ७ गते याक दिवस मनाउने गरि राष्ट्रिय रुपमा पहल गरिरहेको पनि जनाइएको छ । महोत्सवको अवसरमा म्याराथन प्रतियोगिता समेत हुने छ ।