गार्माले दियो स्वास्थ्य संस्थामै सुत्केरी गराउने आमालाई ५ हजार प्रोत्साहन भत्ता

चैत्र ९, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ७ गार्माले स्वास्थ्य संस्थामै सुत्केरी गराउने आमालाई ५ हजार रुपैयाँ प्रोत्साहन भत्ता वितरण गरेको छ । वडा कार्यालयले गर्भवती महिलाहरु स्वस्थ्य संस्थामा नै प्रसुती/सुत्केरी गराए बापत हिमालयन केयर फाउन्डेसनको आर्थिक सहयोग र स्वास्थ्य चौकि गार्माको समन्वयमा नेपाल सरकारबाट प्राप्त हुने रकम बाहेक थप ५ हजार रुपैयाँ प्रोत्साहन भत्ता प्रदान गरेको हो ।

यस्तै बालमैत्री वडा घोषणा गर्ने तयारीमा रहेको वडाले चैत्र ६ गते सुत्केरी घरभेट कार्यक्रम अन्तर्गतको कोसेली सहित ८ जनालाई हजार दिने आमाहरुलाई रकम बितरणका साथै नियमित खोप कार्यक्रमका दिन पारेर गर्भवती तथा हजार दिने आमाहरुलाई पोषण बिशेष अभिमुखिकरण कार्यक्रम सन्चालन गरिएको वडा अध्यक्ष सोनाम ग्याल्जेन शेर्पाले बताउनुभयो ।

गर्भवती महिला, सुत्केरी आमा र नवजात शिशुले अकालमा ज्यान गुमाउन नपरोस् भन्ने उद्देश्यले स्वास्थ्य संस्थामा सुत्केरी हुने आमालाई वडा कार्यालयले प्रोत्साहनस्वरुप रकम दिएको वडा सदस्य भलाकाजी कार्कीले बताउनुभयो । यस कार्यक्रमले महिलालाई स्वास्थ्य संस्थामा नै गएर गर्भ जाँच गराउने र बच्चा जन्माउनुपर्छ भन्ने धारणालाई अभिप्रेरित गर्ने कार्कीको भनाइ छ । ग्रामीण बस्ती भएकाले यहाँका महिलामा अझै पनि स्वाथ्य चौकीमा गएर बच्चा जन्माउनुपर्छ भन्नेसम्मको चेतना नहुँदा अकालमा आमा बच्चा दुवैको ज्यान गुमाउनु पर्ने अवस्था छ ।