भोली देखी साेलुका सरकारी कार्यालय खुल्दै, वेवसाइटमा समस्या हुँदा सेवामा अन्यौलता कायमै

कार्तिक ९, साेलुखुम्बु ।  दसैँ बिदापछि भोलि आइतबार देखि सोलुखुम्बुका सरकारी कार्यालय खुल्दैछन् । तर, वेबसाइट निर्माण तथा सञ्चालनमा प्रयोग हुने पीएचपी प्रोग्रामिङ प्रणालीमा देखिएको सुरक्षा कमजोरीका कारण अधिकांश सरकारी वेबसाइट अझै बन्द रहेकाले कार्यालय खुलेपछि पनि सेवाग्राहीले अनलाइन सेवा लिन समस्या भोग्नुपर्ने देखिएको छ । दसैँ बिदाका कारण कार्यालय बन्द रहेकाले अहिलेसम्म यसको प्रत्यक्ष प्रभाव कम देखिए पनि भोलिदेखि सेवाग्राहीको चाप बढ्ने भएकाले समस्या देखिन सक्ने भएको हो ।

सोलुखुम्बुमा जिल्ला प्रशासन कार्यालय, मालपोत, नापी, कोष तथा लेखा नियन्त्रण कार्यालय लगायत महत्वपुर्ण सरकारी निकायका वेबसाइट तथा अनलाइन प्रणालीमार्फत सूचना, आवेदन, विवरण हेर्ने र सेवा लिने गरिएको छ । वेबसाइट सञ्चालनमा नआए अनलाइनबाट गरिने कतिपय काम प्रभावित हुन सक्नेछन् ।

विशेषगरी नयाँ सेवा लिन, आवेदनको अवस्था बुझ्न, सूचना तथा फाराम डाउनलोड गर्न र अनलाइन प्रणालीमा विवरण प्रविष्ट गर्नुपर्ने सेवाग्राही प्रभावित हुन सक्ने देखिएको छ । कार्यालयमा अनलाइन प्रणालीमा निर्भर सेवा भएमा सेवाग्राहीले प्रत्यक्ष कार्यालय पुगेर पनि तत्काल काम सम्पन्न गर्न नसक्ने अवस्था आउन सक्छ । पीएचपीमा देखिएको सुरक्षा कमजोरीको जोखिमका कारण नेपालका हजारौँ सरकारी वेबसाइट पूर्वसावधानीस्वरूप बन्द गरिएको हो ।

पीएचपीको उक्त कमजोरीको दुरुपयोग भएमा सर्भरमा अनधिकृत पहुँच बनाएर कोड सञ्चालन तथा संवेदनशील तथ्यांक चोरी गर्न सक्ने जोखिम रहेको बताइएको छ । नेपालका अधिकांश सरकारी वेबसाइट साझा प्रणाली जीआईडब्लूआईएमएसमा सञ्चालन हुने भएकाले समस्या देखिएपछि धेरै सरकारी पोर्टल एकैपटक अफलाइन भएका छन् ।

प्रधानमन्त्री तथा मन्त्रिपरिषद् कार्यालयअन्तर्गतको सफ्टवेयर विकास तथा सञ्चालन केन्द्रले सुरक्षा परीक्षण र आवश्यक अद्यावधिकपछि सोमबार वा मंगलबारसम्म अधिकांश वेबसाइट पुनः सञ्चालनमा ल्याउने तयारी गरेको जनाएको छ ।