थुलुङदुधकोशी वडा ७ को सार्वजनिक सुनुवाई सम्पन्न : १ करोड ८० लाखको योजना कार्यान्वयनमा

बैशाख १२, सोलुखुम्बु । सोलुखुम्बुको थुलुङ दुधकोशी गाउँपालिका वडा नम्बर ७ देउसाले चालु आर्थिक बर्षमा १ करोड ८० लाख भन्दा बढी बजेटका योजनाहरु कार्यान्वयन गरिरहेको छ । शुक्रबार वडा कार्यालयमा सम्पन्न सार्वजनिक सुनुवाई कार्यक्रममा वडा अध्यक्ष भोजराज कार्कीले चालु आर्थिक बर्षको बजेट, योजना तथा कार्यक्रमको बारेमा जानकारी गराउनु भएको हो ।

दुधकोशी गाउँपालिकाको आयोजना तथा रेडियो एभरेष्टको सहजिकरणमा सम्पन्न भएको सार्वजनिक सुनुवाईमा वडाका सरोकारवालाहरुले जिज्ञासा तथा सुझावहरु राखेका थिए । सो क्रममा वडा सचिव अशोक कुमार राईले चालु आर्थिक बर्षको चैत्र मसान्तसम्म वडा कार्यालयबाट प्रवाह भएको सेवाको विवरण पेश गर्नु भएको थियो । वडाका निर्वाचित प्रतिनिधिहरु, पुर्व प्रतिनिधिहरु, कर्मचारी, राजनैतिक दलका प्रतिनिधि, टोल सुधार समितिका पदाधिकारी लगायत ७० जना भन्दा बढी नागरिक समाजका अगुवा सहभागि कार्यक्रममा वडा अध्यक्षलाई प्रश्नहरु राखिएको थियो ।

सो क्रममा नागरिकहरुले सडक, खानेपानी, सिचाँई, कृषि, शिक्षा लगायतका विषयको सवाल उठाएका थिए । जवाफ दिने क्रममा वडा अध्यक्ष कार्कीले पालिका, प्रदेश तथा विभिन्न तहबाट पहल गरेर ठूलो बजेट मार्फत पालिकाको विकास निर्माणको काम भईरहेको भन्दै हालसम्मको अवधिमा ५१ लाख १८ हजार रकम विभिन्न योजनामा भुक्तानी भईसकेको बताउनु भयो । वहाँले शिक्षा, सडक, खानेपानी आफ्नो प्राथमिक्तामा रहेको र जनताबाट आएका सुझावलाई पनि आगामि बर्षको कार्यक्रममा समावेश गर्ने प्रतिबद्धता ब्यक्त गर्नु भयो ।

पत्रकार भानुभक्त निरौलाले सहजिकरण गर्नु भएको कार्यक्रममा पुर्व वडा अध्यक्ष रामसंघर्ष किराँतीले आफ्नो कार्यकालमा विकासका जग बसालेको भन्दै बजार ब्यवस्थापन र कृषि क्षेत्रलाई बर्तमान नेतृत्वले प्राथमिक्तामा राख्नु पर्ने सुझाव दिनुभयो । वडाले विकासको काममा दत्तचित्त भएर काम गरेको भन्दै उपस्थित सहभागीहरुले वडा सरकारलाई धन्यवाद व्यक्त गरेका छन् ।