लुवान सिंह राईले ७४ वर्षको उमेरमा नागरिकता पाए, अब नेपाल–भारत आउजाउ सहज

बैशाख २३, सोलुखुम्बु । सोलुखुम्बुको नेचासल्यान गाउँपालिका–५ निवासी लुवान सिंह राईले ७४ वर्षको उमेरमा पहिलोपटक नेपाली नागरिकता प्राप्त गर्नुभएको छ । विगत लामो समयदेखि भारतमा बस्दै आएका राईलाई मंगलबार प्रमुख जिल्ला अधिकारी (प्रजिअ) अनोज कुमार घिमिरेले नेपाली नागरिकता प्रमाणपत्र हस्तान्तरण गर्नुभएको हो । वि.सं २००८ साल मंसिर २९ गते जन्मिएका राईलाई हालसम्म कुनै नागरिकता प्राप्त नभएकोले आवश्यक प्रक्रिया पुरा गरी नागरिकता प्रदान गरिएको प्रजिअ घिमिरेले जानकारी दिनुभयो ।

प्रजिअ घिमिरेले नागरिकहरुलाई सहज सेवा प्रदान गर्न जिल्ला प्रशासन कार्यालय सधैँ तयार रहेको बताउनुभयो । नागरिकता पाएपछि निकै खुसी व्यक्त गर्दै राईले अब नेपाल र भारत आउजाउमा हुने झन्झटबाट मुक्ति पाउने जनाउनुभयो । राईको नागरिकता बनाउन प्रशासनमा सघाउन आएका उहाँका छोरा दिलकुमार राईले निकै लामो समयपछि बुवाको नागरिकता बनाउन पाएकोमा खुशी व्यक्त गर्दै सम्पूर्ण प्रशासनिक टिमलाई धन्यवाद दिनु भएको छ ।

यो नागरिकता वितरणसँगै लामो समयदेखि अधिकारबाट वञ्चित रहँदै आएका एक वृद्ध नागरिकले अब सरकारी सेवा, सुविधा तथा नागरिक अधिकारमा सहभागिता जनाउन पाउने हुनुभएको छ ।