ट्र्याक्टर दुर्घटना हुँदा हलेसीका ४० वर्षीया गीता परियारको मृत्यु

बैशाख २३, सोलुखुम्बु । उदयपुरमा ट्र्याक्टरको ठक्करबाट खोटाङकी एक महिलाको मृत्यु भएको छ, भने एक युवक घाइते भएका छन् । खोटाङको हलेसी तुवाचुङ नगरपालिका–४ की ४० वर्षीया गीता परियारको मृत्यु भएको हो । उनलाई सुनसरीतर्फ फर्किँदै गरेको बेहुली बोकेको ट्र्याक्टरले ठक्कर दिएको थियो । ना ३ त ८१० नम्बरको उक्त ट्र्याक्टरले ठक्कर दिँदा उनी गम्भीर घाइते भएकी थिइन् । उपचारका क्रममा उनको ज्यान गएको इलाका प्रहरी कार्यालय बेलटारका प्रमुख बबिन राईले जानकारी दिनुभयो ।

दुर्घटनामा सुनसरी इटहरी महानगरपालिका–२० का २३ वर्षीय योजन राई घाइते भएका छन् । उनको धरानस्थित बीपी कोइराला स्वास्थ्य विज्ञान प्रतिष्ठानमा उपचार भइरहेको प्रहरीले जनाएको छ । दुर्घटनापछि ट्र्याक्टर चालक ३० वर्षीय विजय विकलाई प्रहरीले नियन्त्रणमा लिएको छ । घटना सम्बन्धमा थप अनुसन्धान भइरहेको जनाइएको छ ।