उदयपुरमा चट्याङ लागेर १३ वर्षीय बालकको मृत्यु

बैशाख २३, सोलुखुम्बु । उदयपुरको कटारी नगरपालिकामा चट्याङ लागेर एक बालकको ज्यान गएको छ। कटारी–८ फूलबारी निवासी १३ वर्षीय चित्रबहादुर वलम्पाकी मगरको सोमबार दिउँसो चट्याङ लागेर मृत्यु भएको वडा अध्यक्ष नवीन तामाङले जानकारी दिनुभयो ।

तामाङका अनुसार चित्रबहादुर दिउँसो बाख्रा चराउन गएका थिए तर साँझसम्म घर नफर्किएपछि परिवारले खोजी थालेको थियो । “साँझ बाख्रा त फर्किए तर छोरा आएनन्, त्यसपछि उनका बुबा मानबहादुर मगर खोज्न गएका थिए,” तामाङले बताउनुभयो, “वनमा चित्रबहादुरलाई चट्याङ लागेर ढलेको अवस्थामा फेला पारेछन् ।

” घटनाबारे इलाका प्रहरी कार्यालय कटारीका प्रमुख, प्रहरी नायब उपरीक्षक कमल बजगाईँले थप अनुसन्धान भइरहेको जानकारी दिनुभयो। प्रहरीले घटनास्थलको निरीक्षण गरी आवश्यक प्रक्रिया अघि बढाइरहेको छ । उक्त घटनाले स्थानिय क्षेत्रमा शोकको वातावरण सिर्जना गरेको छ ।