१५ महिलालाई कृषिमा व्यवसायीक बनाउँदै केपिलास

खोटाङ, बैशाख २३ । खोटाङको केपिलासगढी गाउँपालिका र जि फाउण्डेसन विच महिलाहरूलाई उद्यमशील बनाउनका लागी अनुदान सम्झौता भएको छ । गाउँपालिकाको सहजिकरण, जि फाउण्डेसनको आर्थिक सहयोगमा महिलाहरूलाई शसक्त बनाउँदै स्वरोजगार बनाउने उद्देश्यले यो अनुदान सम्झौता भएको हो । मङ्गलबार एक कार्यक्रमका बीच गाउँपालिका र फाउण्डेसन बिच महिलाहरूलाई उद्यमशील बनाउन उनीहरूले गर्न चाहेका विभिन्न व्यवसायमा आर्थिक सहयोग गरि उनिहरुलाई आत्मनिर्भर बनाउन यो परियोजनाले काम गर्ने गरि सम्झौता भएको गाउँपालिका अध्यक्ष समिर राईले बताउनुभयो ।

उहाँले यो कार्यक्रमले गाउँपालिकाले लिएको समावेशी विकासको दृष्टिकोणलाई थप पुष्टि गरेको जिकिर गर्नुभएको छ । जि फाउण्डेसनले उक्त कार्यक्रम अन्तर्गत गाउँपालिका भित्रका १५ जना महिलाहरूलाई अनुदान सहयोग गर्ने जनाइएको छ । जि फाउण्डेसनले व्यवसायीक महिलाहरूलाई स्टार्टअप अनुदान सहित सेप्टेम्बर २०२५ सम्म प्राविधिक सहयोग सम्म उनिहरूलाई उपलब्ध गराउने जनाइएको छ । कार्यक्रमले नयाँ उद्यम दर्ता गरी कृषि, तथा पशुपङ्क्षी पालनमा आधारित नेतृत्व भएका साना उद्यमहरूलाई बीउ पूँजी, प्राविधिक तालिम र परामर्शमार्फत सशक्त बनाई उनीहरूको व्यवसायका माध्यमबाट स्थानीय स्तरमा रोजगारीका अवसर साथै नव उद्यमी महिलाहरूको आगाम २ वर्ष भित्र ३ सय प्रतिशतले आर्थिक आम्दानीमा वृद्धि गर्ने कार्यक्रमको लक्ष्य रहेको अध्यक्ष राईले बताउनुभयो ।

आफूले सञ्चालन गरेका कृषि उपज, तरकारी खेती, र पशुपंक्षी उत्पादन जस्ता व्यवसायहरुले आफूहरुलाई आत्मनिर्भर बन्न सहयोग गर्ने भएकाले स्थानीय सरकारको यो काम महत्वपूर्ण रहेको अनुदानमा सहभागी महिलाहरूको भनाई छ । कार्यक्रममा जि फाउण्डेसनका प्रतिनिधिले केपीलासगढीले कार्यक्रमप्रति दिएको तदारुकताले आफूहरूको कार्यक्रम थप सफल भएको उल्लेख गर्नुभएको थियो ।