धनकुटा र उदयपुरमा भएको सवारी दुर्घटनाबाट ४ जनाको मृत्यु, १२ घाइते

बैशाख २३, सोलुुखुम्बु । धनकुटा र उदयपुरमा भएको छुट्टाछुट्टै सवारी दुर्घटनामा ४ जनाको मृत्यु भएको छ भने १२ जना घाइते भएका छन् । वैशाख २२ गते बिहान सवा १० बजे धनकुटाको धनकुटा नगरपालिका ६ स्थित कोशी लोकमार्गमा धरानबाट भोजपुर तर्फ जाँदै गरेको यात्रुवाहक बस (नम्बर को. १ ख २१७७) अनियन्त्रित भइ सडकबाट ५० मिटर तल खसी दुर्घटना भएको हो ।

यस दुर्घटनामा बसका चालक सहित १४ जना यात्री घाइते भएका थिए । घटनास्थलमा जिल्ला प्रहरी कार्यालय धनकुटाबाट प्रहरी टोली खटी घाइतेलाई उद्धार गरी उपचारको लागि विभिन्न अस्पतालमा पठाएको थियो । दुर्घटनामा बसका चालक, सुनसरी धरान उपमहानगरपालिका १३ का ५१ वर्षीय रुद्र तामाङ, भोजपुर षडानन्द नगरपालिका १३ का ५८ वर्षीय लिला बहादुर श्रेष्ठ, धनकुटा नगरपालिका ६ की ७३ वर्षीय कृष्ण कुमारी राई भुजेलको उपचारको क्रममा मृत्यु भएको पुष्टि भएको छ ।

अन्य ११ जना घाइतेलाई धरान घोपामा उपचार भइरहेको छ । सोही दिन अपराह्न पौने ४ बजे, खोटाङबाट इटहरी तर्फ जन्ती बोकेर आउँदै गरेको अर्को बस उदयपुरको चौदण्डीगढी नगरपालिका ४ स्थित बर्षेडाडामा मदन भण्डारी लोकमार्गमा रोकेको थियो । त्यतिबेला बसमा रहेका जन्तीहरू हलेसी तुवाचुङ नगरपालिका ४ की ४० वर्षीया गिता परियार र सुनसरी इटहरी २० का २३ वर्षीय युजन राई सडक पार गर्दै थिए । त्यतिबेला ना.३ त ८१० नम्बरको ट्याक्टरले उनीहरूलाई ठक्कर दिएको थियो ।

दुर्घटनामा गिता परियारको उपचारको क्रममा परियाको नगर अस्पताल बेल्टारमा मृत्यु भएको छ भने युजन राईको उपचार विराटनगर न्यूरो अस्पतालमा भइरहेको छ । यस दुर्घटनामा संलग्न ट्याक्टर चालक ३० बर्षिय विजय बि.क., उदयपुर चौदण्डीगढी ४ का, र बस चालक ३६ बर्षिय पुरुषोत्तम पोखरेल रहेका छन् । यस घटनामा १२ जना घाइते भएका छन् जसको उपचार जारी छ ।