बैशाख २३, सोलुखुम्बु । सोलुखुम्बुको सोलुदुधकुण्ड नगरपालिकाले नगर कार्यपालिकाको बैशाख ५ गते सम्पन्न बैठकको निर्णय अनुसार नगर क्षेत्रभित्रका कालोपत्रे तथा कच्ची सडक खण्डमा ट्याक्टर र १० चक्रे ठूला सवारीसाधन सञ्चालनमा रोक लगाएको छ । बैठकमा गरिएको निर्णयअनुसार यस्ता सवारीसाधनको सञ्चालनले सडकको संरचनागत गुणस्तरमा गम्भीर क्षति पु¥याउने, सवारी आवागमनमा अवरोध सिर्जना हुने र विशेषगरी बर्षायाममा मर्मत सम्भारमा समस्या आउने भएकाले यो प्रतिबन्ध आवश्यक भएको जनाइएको छ ।
प्रतिबन्ध अन्तर्गत ट्याक्टर तथा कच्ची सडकमा १० चक्रे सवारीसाधनको सञ्चालनमा जेठ १५ देखि असोज ३० सम्म पूर्ण रूपमा रोक लगाइनेछ भने, कालोपत्रे सडकमा पनि यस्ता सवारीसाधन सञ्चालनमा नियन्त्रण गरिनेछ ।
यस निर्णयको प्रभावकारी कार्यान्वयनका लागि सोलुदुधकुण्ड नगरपालिका वडा नम्बर ५ सल्लेरीका कार्यवाहक वडा अध्यक्ष पासाङ शेर्पाले सम्बन्धित सबै निकाय, स्थानीय बासिन्दा र सवारीधनीहरुलाई आवश्यक सहयोग र समन्वय गर्न अनुरोध गर्नुभएको छ । नगरपालिकाले यो निर्णय सडक संरचना संरक्षण, सुरक्षित आवागमन र दीर्घकालीन विकासलाई ध्यानमा राखी गरिएको स्पष्ट पारेको छ ।
Discussion about this post