सल्लेरीमा खाद्य महोत्सव, स्थानीय कृषि उत्पादनको प्रदर्शन तथा बिक्री

कार्तिक १४, सोलुखुम्बु ।  सोलुखुम्बुको सदरमुकाम सल्लेरीमा शनिबार खाद्य महोत्सव आयोजना गरिएको छ । स्थानीय कृषि उत्पादनको प्रवद्र्धन, प्राङ्गारिक खेतीप्रति प्रोत्साहन तथा किसानले उत्पादन गरेका वस्तुको बजारीकरण गर्ने उद्देश्यले महोत्सव आयोजना गरिएको हो ।

हसेरको प्राविधिक सहयोग तथा एफआइएआर, ओसिरिस, शोक फामिलियन स्टिफ्टुङ, सोलिकन इट, सोरप्टिमिस्ट इन्टरनेसनल, टुलबक्सलगायत विभिन्न संघसंस्थाको सहकार्यमा महोत्सव आयोजना गरिएको आयोजकले जनाएको छ । महोत्सवमा कृषकले आफूले सिकेको सीप र प्रविधिको प्रयोग गरी उत्पादन गरेका तरकारी तथा फलफूल प्रदर्शन गर्नुका साथै बिक्रीसमेत गरेका थिए । महोत्सवमा सहभागीलाई प्राङ्गारिक खाद्य परिकारको स्वाद चखाइएको थियो। कार्यक्रममा किसानले कृषि तथा महिला सशक्तीकरणका क्षेत्रमा सहयोग पुर्याउने संघसंस्थाप्रति आभार व्यक्त गरेका थिए। सहयोगी संस्थाहरूले सोलुदुधकुण्ड नगरपालिकाका घुन्सा, कुनिखोप, मेराङ्दिन र च्याङ्सारमा प्राङ्गारिक कृषि तालिम सञ्चालन, जग्गा खरिद तथा सहकारी भवन निर्माण, कक्षा ११ र १२ मा छात्रवृत्ति, विश्वविद्यालय अध्ययनका लागि छात्रवृत्तिको सुरुवात, घुम्ती कोष स्थापना तथा बालिका क्लब गठनलगायतका काममा सहयोग गरेका छन् ।

महोत्सवमा नमराज सिलवालले सोलुखुम्बुमा बितेका १० वर्ष किसान, महिला तथा अभियानमा आबद्ध सबैका लागि विशेष यात्राका रूपमा रहेको बताउनुभयो । छरिएर रहेका किसान समूह, अनौपचारिक भेटघाट र महिला सशक्तीकरणको सपनाबाट सुरु भएको अभियान क्रमशः उपलब्धिमूलक बन्दै गएको उहाँको भनाइ छ । उहाँका अनुसार चार गाउँमा स्थापना भएका चार सहकारी सेवा केन्द्र यस यात्राका उपलब्धिका प्रतीक बनेका छन्। सहकारीमार्फत महिलाले कृषि, प्राङ्गारिक प्रमाणीकरण, सिलाइ तथा सहकारी व्यवस्थापनजस्ता क्षेत्रमा ज्ञान, सीप र अनुभव हासिल गरेका छन् ।

कुनै समय बैठकमा बोल्न हिच्किचाउने र आफ्ना विचारलाई महत्त्वपूर्ण नठान्ने महिलाहरू अहिले सहकारीको नेतृत्व गर्नुका साथै अरूलाई तालिम दिन र थप महिलालाई अघि बढ्न प्रेरित गर्न सक्षम भएका छन् । सहकारीहरू सामुदायिक समन्वय, योजना निर्माण तथा आर्थिक विकासका आधारसमेत बनेको उहाँले बताउनुभयो। सिलवालका अनुसार महिलाहरूको सामूहिक बचत २१ लाख रुपैयाँभन्दा बढी पुगेको छ भने घुम्ती कोषमार्फत १० लाख रुपैयाँभन्दा बढी रकम परिचालन गरिएको छ ।

किसानले उक्त कोषको उपयोग कृषि व्यवसाय विस्तार, उत्पादन वृद्धि तथा आम्दानीका नयाँ अवसर सिर्जना गर्न गर्दै आएका छन् । महोत्सवमा सोलुदुधकुण्ड नगरपालिकाकी उपप्रमुख गान्धिमाया तामाङ, वडा नम्बर ७ का वडाध्यक्ष सोनाम ग्याल्जेन शेर्पालगायतको उपस्थिति रहेको थियो ।