कातिक ३०, सोलुखुम्बु । नेकपा (एमाले) की नेतृ सूर्यकुमारी सुनुवारले पार्टी परित्याग गरेकी छन् । झन्डै चार दशक (३९ वर्ष) लामो राजनीतिक यात्रालाई बिट मार्दै उनले एमाले छाडेको घोषणा गरेकी हुन् । सुनुवारको राजनीतिक यात्रा वि.सं. २०४४ सालबाट सुरु भएको थियो। त्यतिबेला कक्षा ८ मा अध्ययनरत रहँदा १३ वर्षकै कलिलो उमेरमा उनी अनेरास्ववियुको प्रारम्भिक कमिटी (प्रा.क.) सदस्य बनेर राजनीतिमा होमिएकी थिइन्।
विद्यार्थी आन्दोलनका क्रममा उनी विद्यालयबाट ’रेस्टिकेट’ (निष्कासन) समेत भएकी थिइन् । त्यसपछि २०४६ सालको ऐतिहासिक जनआन्दोलनका बेला ओखलढुंगामा रहेर भूमिगत जनसंगठनमा सक्रिय भूमिका निर्वाह गरेकी सुनुवार २०४६ चैत २६ गते प्रजातन्त्रको घोषणापश्चात् सोलुखुम्बुमा पार्टी संगठन विस्तारको काममा तल्लीन रहिन्। वि.सं. २०४७ साल साउन १० गते पार्टीकै पहलमा नेकपा एमाले सोलुखुम्बुका संस्थापक नेता क. डि.बी. किरातीसँग उनको जनवादी विवाह सम्पन्न भएको थियो।
विवाहपश्चात् पनि उनले जनताको सेवा र पार्टी निर्माणमा क. डि.बी. किरातीसँगै काँधमा काँध र पाइलामा पाइला मिलाएर निरन्तर खटिएकी थिइन्। लामो राजनीतिक जीवनमा उनले पार्टीको विभिन्न महत्त्वपूर्ण जिम्मेवारी सम्हालेकी छन्। सुनुवारले एमालेको कोशी प्रदेश कमिटीमा रहेर दुई कार्यकाल काम गरिसकेकी छन्।
यसैगरी, जनवर्गीय संगठनतर्फ अखिल नेपाल महिला संघ (अनेमसंघ) को केन्द्रीय सदस्यका रूपमा दुई कार्यकाल, जनसांस्कृतिक महासंघको केन्द्रीय सदस्य तथा जनजाति महासंघको केन्द्रीय सदस्यको भूमिकासमेत सफलतापूर्वक निर्वाह गरेकी थिइन्। करिब चार दशकसम्म पार्टी र जनवर्गीय संगठनमा रहेर महत्त्वपूर्ण योगदान पुरÞ्याएकी नेतृ सुनुवारले ३९ वर्षको लामो यात्रापछि पार्टी परित्याग गरेकी हुन् ।











Discussion about this post