भुवाखोलामा बन्यो महाकुलुङकै पहिलो मोटरेवल पुल 

बैशाख २५, सोलुखुम्बु । सोलुखुम्बुको महाकुलुङ गाउँपालिकाकै पहिलो पक्कीपुल उद्‌घाटन गरिएको छ ।  गाउँपालिकाको वडा नम्बर २ स्थित भुवाखोलामाथि निर्माण भएको पालिकाकै पहिलो पक्की मोटरेवल पुलको आज उद्घाटन गरिएको हो । वर्षायाममा ठुलो सास्ती भोगेर आवतजावत गर्नुपर्ने महाकुलुङबासीको समस्या पक्कीपुल निर्माण सम्पन्न भएसँगै हल भएको छ ।

महाकुलुङ गाउँपालिकाको २ करोड ५० लाख र गत आर्थिक वर्ष २०७८/७९ मा कोशी प्रदेश सांसद विकास कोषबाट तत्कालीन राज्यमन्त्री उत्तम बस्नेतद्वारा विनियोजित ५० लाख बजेट गरि करिव ३ कराेड रुपैयाँ बजेटमा पुल निर्माण सम्पन्न भएको गाउँपालिकाको वडा नम्बर २ का अध्यक्ष प्रदिप कुलुङले बताउनुभयो । २५ मिटर लम्बाइ र स्पान सङ्ख्या १ रहेको यो पुल बनेपछि गाउँपालिका बासीले राहतको सास फेरेको छन् ।  यस अघि खोलामा ह्युम पाइप राखेर सावरी साधन आवतजावत भइरहेकोमा अव भने बाह्रै महिना सहज आवतजावतका लागी गाउँपालिका बासीलाई बाटो। खुलेको गाउँपालिका अध्यक्ष सुर्य कुलुङले बताउनुभयो ।

उक्त पुल बनेपछि गाउँपालिका भित्रका नागरिकलाई मात्रै नभएर अन्तर जिल्ला भोजपुर खोटाङ, लगायतका जिल्ला आवतजावतका लागी समेत सहज भएको छ ।  विहीबार गाउँपालिका अध्यक्ष सुर्य कुलुङको प्रमुख आतिथ्यता एवं वडा नम्बर २ का अध्यक्ष प्रदिप कुलुङको अध्यक्षतामा सम्पन्न एक औपचारिक कार्यक्रमका बीच दुवैले रिवन काटेर फुको उद्घाटन गर्नुभएको छ ।  यसैबीच वडा नम्बर २ कै फुलवाछी खोलामा समेत मोटरेवल पक्की पुल निर्माणको अन्तिम चरणमा रहेको भन्दै अध्यक्ष प्रदिप कुलुङले उक्त पुल समेत आगामी एक महिना भित्र सम्पन्न भइसक्ने उल्लेख गर्नुभयो ।