थुलुङका नागरिकलाई काठमाण्डौमा उपचार गराउँदा छुटै छुट, नेले विकास समाजले गर्यो सम्झौता

बैशाख २५, सोलुखुम्बु । सोलुखुम्बुको थुलुङ दुधकोशी गाउँपालिकाका नागरिकलाई काठमाण्डौमा उपचार गराउँदा छुट सहितको सेवा प्राप्त हुने भएको छ । नेले विकास समाज काठमाण्डौ र हेल्पिङ ह्याण्ड्स सामुदायिक अस्पताल बीच थुलुङ दुधकोशी गाउँपालिकाका ९ वटा वडाका नागरिकसँगै गाउँपालिका स्थायी बसोबास भई विभिन्न पेशा व्यवसायमा आवद्ध भई काठमाण्डौमै बसोबास गर्दै आइरहेकाहरुलाई हेल्पिङ ह्याण्ड्स सामुदायिक अस्पतालमा उपचार गराउँदा छुट सहितको सेवा दिने गरी सम्झौता भएको हो ।

नेले विकास समाजका अध्यक्ष रोशन बाबु थुलुङ र हेल्पिङ ह्याण्ड्स सामुदायिक अस्पतालका प्रशासक डाक्टर रविन पोखरेल बीच भएको सम्झौता अनुरुप २ वर्ष सम्म थुलुङ दुधकोशी गाउँपालिका भित्रका नागरिकलाई छुटमा उपचार सेवा दिने सहमति भएको छ । अस्पतालले तोकिएका १० वटा सेवामा अधिकतम ७५ प्रतिशत र न्यूनतम ७ प्रतिशत छुट सहित सेवा दिने छ । जस मध्ये ओपीडि जनरलमा ७५ प्रतिशत छुट प्राप्त हुने नेले विकास समाजका अध्यक्ष रोशन थुलुङले बताउनुभयो ।

उहाँले जनरल बेडमा ५० प्रतिशत, डिलक्स क्याबिनमा १५ प्रतिशत, सुपर डिलक्स क्याबिनमा १५ प्रतिशत, प्याथोलोजी ल्याब र एक्सरेमा २० प्रतिशत, भिडियो एक्सरे अल्ट्रा साउण्डमा १० प्रतिशत, इकोकार्डियोग्राफिमा १० प्रतिशत, अपरेसन थिएटर चार्जमा १० प्रतिशत, प्रसूति सेवामा २० प्रतिशत र फार्मेसी (औषधी) खरिदमा ७ प्रतिशत सम्म छुट दिने गरि सम्झौता भएको बताउनुभयो । २०८४ बैशाख २७ गते सम्म सेवा दिने गरि सम्झौता भएको जनाईएको छ । सम्झौतामा हस्ताक्षर गर्ने एक औपचारिक भेटमा थुलुङ दुधकोशी गाउँपालिका वडा नम्बर १ नेलेका वडा अध्यक्ष घनराज सुनुवारको समेत उपस्थिति रहेको थियो ।