सोलुखुम्बुमा टिफर दुर्घटना, चालक घाइते

पौष ३, सोलुखुम्बु । सोलु दुधकुण्ड नगरपालिका वडा नम्बर ४, रोक्दिन स्थित भित्री सडक खण्डमा बिहिबार दिउँसो करिब २ः५० बजे टिफर दुर्घटना भएको छ। प्रदेश १–०२–००१ ख ५८५६ नं. को टिफर बेनीबाट चिवाङ गुम्बा तर्फ गिटी लिएर जाँदै गरेको अवस्थामा सडकदेखि करिब २०० मिटर तल पल्टिएको हो । दुर्घटनामा चालक, सुनकोशी गाउँपालिका वडा नम्बर ५ बस्ने २६ वर्षीय पासाङ लामा घाइते भएका छन् ।

उनको बायाँ हात र टाउकोमा चोट लागेको छ भने अवस्था सामान्य रहेको र बोल्न सक्ने क्षमता छ । उनको उपचार हाल जिल्ला अस्पताल फाप्लुमा भइरहेको छ । जिल्ला प्रहरी कार्यालय सोलुखुम्बुका अनुसार दुर्घटना भएको खबर पाए लगत्तै फाप्लुबाट प्रहरी टोली घटनास्थलतर्फ खटिएको थियो । टिफर अहिले पनि घटनास्थलमै रहेको र उठाउने कार्य सुरु गरिएको प्रहरीले जनाएको छ ।